Qytaıdaǵy «Qazaq jaýyngeri» salmaq ólsheý rásiminen sátti ótti
ASTANA. QazAqparat - Elshat Nyǵmetolla - kásipqoı rıngte Qytaıdyń atynan óner kórsetip júrgen qazaq boksshysy. Ol Shenchjen (Qytaı) qalasynda jekpe-jek aldyndaǵy salmaq ólsheý rásiminen ótti, dep habarlaıdy «Profı Boks Kazahstana».
Elshattyń qarsylasy ındonezııalyq boksshy Ikal Tobıda (13-23-1, 8KO). Sportshylar 53,5 keli salmaq dárejesine deıingi shekteýden sátti ótti.
Onyń kásipqoı rıngtegi kezekti kezdesýi búgin, 6 qańtarda Qytaıdyń Shenchjen qalasynda bolady.
Aıta ketken jón, esh jeńilip kórmegen 23 jastaǵy qazaq boksshysy WBO tujyrymy boıynsha jeńil salmaqta (53,5 kelige deıin - 118 fýnt) Azııa chempıony. Ol 15 jeltoqsan kúni kásipqoı bokstaǵy 12-shi jekpe-jeginde jeńiske jetken bolatyn.
«Qazaq jaýyngeri» atymen tanymal Elshat Nyǵmetolla Qanat Islamnyń jerlesi. Eki boksshy da Shyńjańnyń Altaı aımaǵynda dúnıege kelgen.
