Qytaıdaǵy qazaq qyzy 2017 asyqtan Qazaqstannyń týyn jasady

ASTANA. QazAqparat - «Bıyldyń basynan beri asyq jınap, jazda alshysynan turǵan 2 017 asyqtan osy týyndyny jasadym. Kórip otyrǵanyńyzdaı, bunda Qazaqstannyń Memlekettik Týy beınelengen. Osy rette qazaǵymnyń asyǵy árdaıym alshysynan tússin degen ıdeıany negizge aldym»,-dedi Qulan Jarqynqyzy «QazAqparat» tilshisine bergen suhbatynda.

Sonymen qatar sheber qyz óziniń armany týraly da aıtyp berdi.

«Qytaıda mektepti támamdaǵannan keıin Qazaqstanǵa kelip, azamattyǵyn alý negizgi josparymda bar. Osy rette aldaǵy jyly Elbasynyń atyndaǵy Nazarbaev Ýnıversıtetine oqýǵa túskim keledi»,-dedi Q. Jarqynqyzy.

Aıta keteıik, búgin QR Ulttyq mýzeıinde Qazaq kóshi bastalýynyń 25 jyldyǵyna jáne EKSPO-2017 kórmesine arnalǵan «Atamura urpaqqa mıras» atty ǵylymı-tájirıbelik konferentsııa ótti. Osy shara aıasynda sheteldegi qazaqtar saqtap júrgen jádigerler, ótken ǵasyrda jasalǵan kúmis er, alasha, jáne basqa da qolóner buıymdary usynylǵan kórme uıymdastyrylyp, osy qundy zattardyń barlyǵy Ulttyq mýzeıge syıǵa tartyldy. Konferentsııaǵa shetelden kelgen qandastarymyz, zııaly qaýym ókilderi, ǵalymdar, qala turǵyndary qatysty.