Qytaıdaǵy qazaq boksshysy eki nusqa boıynsha Azııa chempıony atandy

ASTANA.QazAqparat - Qytaıda turatyn 23 jastaǵy kásipqoı qazaq boksshy Beısenbi Násıollauly (12-0-1, 5KO) 7 mamyr kúni ótken kezekti kezdesýinde jeńiske jetip, sýper jeńil salmaqta (63,5 keli - 140 fýnt) eki nusqa boıynsha Azııa chempıony tıtýlyn jeńip aldy, dep habarlaıdy QazAqparat tilshisi.

10 raýndqa sozylǵan jekpe-jekte Beısen japondyq qarsylasy Taısho Ozaýany aıqyn basymdyqpen (98:91,98:91,98:91) tize búktirip, WBA jáne WBC nusqasy boıynsha Azııa chempıony tıtýlyn (WBA International super lightweight title,WBC Asian Boxing Council Continental super lightweight title) ıelendi.

Sol kúni qytaıdyń «Tıan-Shan barysy» atanyp júrgen asa jeńil salmaqtaǵy (52,1 keli - 115 fýnt) qazaq boksshy Ulan Tóleýǵazy (5-3-0, 1KO) ındonezııalyq Noıldı Manakanemen (32-22-2, 18KO) 10 raýnd boıy judyryqtasyp, tóreshiler sheshimimen (98:91,98:91,99:90) jeńdi. Osylaısha, Ulan 55,3 kelidegi (122 fýnt) WBA nusqa boıynsha Azııa chempıony ataǵyn jeńip aldy.

Aıta keteıik, qytaılyq jankúıerler Golovkınniń izbasary dep, «OneG» atap ketken Beısenbi kásibı rıngte jalpy 12 kezdesý ótkizip, 11 aıqasta jeńiske jetken (5 nokaýt) jáne bireýinde teń túsken. Qandasymyz 2015 jyly - 7, 2016 jyly 5 kezdesý ótkizip, WBC nusqasy boıynsha bokstan jastar arasyndaǵy álem chempıony (WBC World Youth Champion) jáne WBA boıynsha Qytaı chempıony atanǵan bolatyn.