Qytaıdaǵy qazaq boksshynyń ádiletsiz jeńilisi jankúıerlerdiń narazylyǵyn týdyrdy
ASTANA.QazAqparat - Tıantszın qalasynda ótip jatqan XIII kezekti jazǵy jalpy qytaılyq spartakıadasynyń bokstan barlyq salmaq dárejesindegi fınaldyq básekesi óz máresine jetti, dep habarlaıdy QazAqparat tilshisi.
Erler arasyndaǵy 75 kg salmaqta Hýbeı provıntsııasynyń sportshysy Ven Inhań jáne Shyńjań avtonomııalyq ólkesiniń boksshysy, ulty qazaq Toqtarbek Tańlathanuly qolǵap túıistirdi.
Aqtyq básekeni Qytaıdyń ortalyq telearnasy CCTV-5 sporttyq kanaly tikeleı efırde kórsetti. 5 raýndqa sozylǵan jekpe-jekte Toqtarbek qarsylasyna joıqyn soqqylaryn dál tıgizip, aıqyn basymdylyq kórsetkendigin baıqaýǵa bolady. Qytaılyq komentatorlar Toqtarbekti «aıqyn basymdylyqpen jeńiske jetti» -, degen qorytyndy jasaǵan tusta, tóreshiler jeńisti 5:0 esebimen Ven Inhańǵa berdi.
Tóreshiniń ashyq ádiletsizdigine qytaılyq boks jankúıerleri óz narazylyǵyn bildirdi. Olardyń basty ustanymy basqa ulttardyń sporttaǵy jetistigin qaqpaılamaı, olardyń Qytaı boksynyń damýyna qosqan úlesterin baǵalaý kerek ekenin aıtýda. Al shyńjańdyq jankúıerler bul jáıt Shyńjań sportshylary úshin qalypty jaǵdaı ekenin bildirdi.
Aıta keteıik, Shyńjań-Uıǵyr avtonomııalyq ólkesi uıǵyr, qazaq jáne basqa 13 ulttar meken etip otyrǵan jer. Qazaqstandyq tanymal kásipqoı boksshy Qanat Islam osy óńirdiń qazaqtar shoǵyrlanǵan Altaı aımaǵy Qaba aýdanynda dúnıege kelip, jastaıynan Shyńjań boks quramasy sapynda óner kórsetken. Búl kúnde Shyńjań boksshylary Qytaı atynan halyqaralyq básekelerde jáne Olımpıada oıyndarynda top jaryp keledi.
