Qytaıdaǵy qatań karantın saldarynan munaı baǵasy tústi

BAKÝ. QazAqparat - Qytaıda uzaqqa sozylǵan karantın saldarynan álem boıynsha energııaǵa suranystyń artýy, AQSh-ta paıyzdyq stavkalardyń ósýi munaı baǵasynyń 5%-dan astam tómendeýine yqpal etti, dep habarlaıdy QazAqparat Investing.com saıtyna silteme jasap.

Munaı baǵasy eki aptada ekinshi ret barreline 100 dollardan tómen tústi. Bul jaǵdaı Reseıge qarsy sanktsııalar men OPEK-tiń munaı naryǵyn baqylaý áreketinen týyndaǵan qubylmalylyqqa qaramastan oryn alyp otyr.

Londonda saýdalanyp otyrǵan Brent markaly munaı etalony dúısenbi kúni saǵat 12:15-te barreline $100,06-ǵa deıin 6,09 dollarǵa nemese 5,7%-ǵa arzandady. Onyń baǵasy ótken aptada tómendeı bastap, 4,5%-dy qurady.

Ýkraınadaǵy áskerı áreketterden keıin eki aptadan soń, ıaǵnı 7 naýryzda 139,15 dollarǵa kóterildi jáne bul munaı ósiminiń eń joǵarǵy kórsetkishi retinde tirkeldi. Búgingi munaı baǵasy osy ósimnen keıingi eń tómen kórsetkish bolyp otyr.

Nıý-Iorkte WTI markaly munaı baǵasy 5,91 dollarǵa nemese 5,8%-ǵa arzandap, 96,16 dollardy qurady. Brent sııaqty, WTI markasy da ótken aptada 4,5% tómendep, bir aıda 4% joǵaltty. 7 naýryzda WTI markaly munaı baǵasy 130,50 dollarǵa deıin kóterilgen.

Munaıdyń eki markasy da ótken aptada shamamen 5% tómendegennen keıin eń tómengi jabylý deńgeıge jaqyn boldy. Baǵa naýryzdyń basynda 2008 jyldan bergi eń joǵary deńgeıden shamamen 25%-ǵa tómendedi.

Eki apta buryn Batystyń Reseı munaıyna salǵan sanktsııalary munaıdyń jalǵyz iri faktory bolǵan. Biraq Qytaıdaǵy koronavırýspen baılanysty jaǵdaı álemdegi eń iri munaı ımporttaýshynyń mobıldiligin shektep, munaı naryǵyna teris áser ákeldi.

Qytaı – álemdegi eń iri munaı ımporttaýshy el, biraq Shanhaıdaǵy tórtinshi aptaǵa sozylǵan karantın men oǵan qosa AQSh dollarynyń kóterilýi energetııa tasymaldaýshylarǵa qysym jasap, munaı baǵasynyń bıylǵy eń joǵary $140 deńgeıine qaıta oralý yqtımaldyǵyn tómendetip otyr.