Qytaıdaǵy qandastarymyz latyn álipbıine kóshýge daıyndyq jumystaryn júrgizip jatyr
ASTANA. 26 mamyr. QazAqparat /Rýslan Ǵabbasov/ - Qytaıdaǵy qandastarymyz latyn álipbıine kóshýge daıyndyq jumystaryn júrgizip jatyr.Bul týraly búgin QR Baılanys jáne aqparat mınıstrligindegi «Sheteldegi qazaqtarǵa arnalǵan BAQ: qazirgi jaǵdaıy jáne máseleleri» atty dóńgelek ústelde málim boldy.
Atalaǵan dóńgelek ústel barysynda Qytaıdaǵy qazaq tildi jýrnalıster Qazaqstan latyn árpine tolyǵymen qashan kóshetini jaıynda saýal qoıdy. Olardyń sózine qaraǵanda, Qazaqstan latyn árpine kóshedi degen habar taraǵannan keıin, Qytaıdaǵy qandastarymyz osy baǵytta tıisti daıyndyq jumystaryn júrgize bastaǵan.
Óz kezeginde Til komıtetiniń taldaý jáne monıtorıng basqarmasynyń bastyǵy Roza Joldybaeva latyn álipbıine kóshý aýqymdy jumystardy qajet etetinin aıtyp ótti. «Búginde elimizde osy sharaǵa daıyndyq jumystary júrip jatyr. Biraq 3-4 jyldyń ishinde sheshiletin másele emes. Negizi latyn álipbıine kóshetinimiz - ol anyq»,-dedi R. Joldybaeva.
Aıta keteıik, dóńgelek ústel Astanadaǵy Dúnıejúzi qazaqtarynyń IV Quryltaıy aıasynda uıymdastyrylyp otyr. Oǵan Qytaı, Reseı, Ózbekstan, Mońǵolııa, Túrkııa, Germanııa, Iran, Qyrǵyzstan elderinen kelgen delegatsııa músheleri men elimizdegi jetekshi buqaralyq aqparat quraldarynyń basshylary qatysty.
