Qytaıdaǵy qandastarymyz Astanada nekesin qıdyrdy
ASTANA. QazAqparat - Qytaıdyń Beıjiń qalasynan Astanaǵa eki jas arnaıy nekesin qıdyrýǵa keldi. Ekeýi de qarakóz qandastarymyz, dep jazady «Egemen Qazaqstan» gazeti búgingi sanynda.
Úılenip jatqan jigit Beıjiń qalasyndaǵy Ulttar radıosynyń «Qazaq radıosy» bóliminde uzaq jyldar boıy aǵa dıktor bolyp qyzmet etip kele jatqan əriptesimiz Qyzyrbek Janasyldyń balasy eken. Əkesi balasynyń nekesi týǵan eliniń astanasynda qıylǵanyn qalapty.
Neke qııý kezinde barlyq ədet-ǵuryptar jasalyp, Quzar Qyzyrbekuly men Altynaı Səbıtjanqyzyna «Əziret Sultan» meshitiniń ımamy batasyn berip, shańyraqtarynyń bıik bolýyn tiledi. Eki jastyń shańyraq kóterýine meshitke bes ýaqyt namazyn oqýǵa, Quran oqytýǵa kelgen júzdegen adamdar kýə boldy.
- Biz Beıjińnen Astanaǵa nekemizdi qıdyrýǵa arnaıy keldik. Týǵan elimiz, ata mekenimiz bolǵan soń ómirdegi eń jaýapty da qýanyshty kúnimizdi Astanada ótkizgimiz keldi. Bizge meshit keremet əser etti. Bul jerde meshit ımamdarynyń ýaǵyzdaryn tyńdadyq, - dedi jastar.
