Qytaıdaǵy qandastarymyz «Aq qardaǵy - aq mahabbat» qar-muz saıahat merekesin ótkizdi
ASTANA. QazAqparat - Shynjańnyń Іle Qazaq avtonomııaly ólkesine qarasty Mońǵolkúre aýdanynda «Aq qardaǵy - aq mahabbat» jáne «Soǵym mádenıeti» atty qar-muz saıahat merekesi ótti, dep habarlaıdy QazAqparat.
Qytaıdyń «Táńir taý» portalynyń málimetine qaraǵanda, sharanyń basty maqsaty - «Kelin túsirý» jáne «Soǵym soıý» sekildi ultymyzdyń asyl murasyn, salt-dástúrin jańǵyrtyp, búgingi urpaqqa dáripteý.
«Bul sharada ultymyzdyń asyl murasynyń biregeıi - kelin túsirý dástúrin baǵzy zamannyń baıandy tirshiligimen sabaqtastyra otyryp, úzilmeı kele jatqan ulttyq qundylyqtarymyzdy búgingi urpaqqa dáripteý maqsat etilgen. Kelindi shyǵarýdyń aldynda atqa qonǵan jigitter qazaq úıdiń keregesin túrip tastap, aýjar, jar-jar aıtsa, kıiz úıdiń ishindegi jas kelinder men qyzdar jyr tilimen ádemilep syńsyma aıtyp, búkil eldiń kóńil-kúıin tolqytty. Ata-áje jáne baýyr týystarymen kóristirip, qoshtasý salty aıaqtalǵannan keıin, jezdesi qyzdy qoltyqtap, atqa qondyrdy. Ádemi kıingen qyz-kelinshekter, apalar shanaǵa otyryp, qarly dalada qyz kóshimen jarasym tapty. Kelin túsken jerde shashý shashylyp, kelinniń beti ashyldy. Bosaǵada jeńgeleri otpen maıdy daıarlap turyp, kelinge otqa maı salǵyzyp, tútin shyǵardy. Mundaǵy maqsat ejelgi kóshpendilerden kele jatqan, «Bul áýletke kelin maıdaı sińip, jaıly, ıbaly bolsyn» degen tanymyn bildirse, otpen maıdyń qosylyp janýyn «mahabbattary ottaı ystyq, tútinderi túzý ushsyn» degen yrym edi», - dep jazady «Táńir taý» saıty.
Sharaı aıasynda, qazaq halqynyń qonaq kútýi, soǵym soıý, jilikteý jáne qonaqtardyń jas ereksheligine, dárejesine qaraı sybaǵa tartý sekildi ádet-ǵuryptary kórsetilgen.
