Qytaıdaǵy qandastar kıiz úı tigýden jarys ótkizdi
ASTANA. 26 qyrkúıek. QazAqparat - Qytaıdaǵy qandastar qazaqtyń ulttyq qolónerin ulyqtaýǵa baǵyttalǵan eleýli shara ótkizdi.
«Kenishti Kóktoǵaıda jalǵasqan ulttyq dástúr» atty kórme-baıqaý Qytaıdaǵy Altaı aımaǵynyń Kóktoǵaı aýdanynda uıymdastyryldy. Bul jóninde Halyq toraby saıtynda jarııalandy, dep habarlaıdy BAQ.KZ.
Kóktoǵaı aýdanynda aýdandyq aqyndar aıtysyna oraılastyryp uıymdastyrylǵan «Kenishti Kóktoǵaıda jalǵasqan ulttyq dástúr» atty kórmede keste tigý, jún shúıkelep jip ıirý, shı toqyp órnek salý, oıý-órnek syzý jáne órimshilik saıystary qosa ótkizildi. Atalǵan saıystar boıynsha ár aýyl, qalashyqtardan 60-qa jýyq qolónershi qatysqan. Buǵan qosa kıiz úı tigý jáne ony jyǵý, túıege júk artýdan da jarystar uıymdastyrylǵan. Kórmege qatysýshylar qazaqy as ázirleý jáne tamaqtaný ádebi sııaqty saıystarǵa da qatysqan. Qolónershiler jıynynda aǵashtan túıin túıetin jáne ulttyq kıim-keshek tigetin sheberlerdi anyqtaý da qamtylǵan.
