Qytaıdaǵy qandas jazýshymyz Qajyǵumar Shabdanuly dúnıeden ozdy
ALMATY. 15 aqpan. QazAqparat /Erbol Turymbetov/ - Búgin Qytaıdaǵy qazaq qalamgeri Qajyǵumar Shabdanuly 86 jasynda Sháýeshektegi óz úıinde uzaqqa sozylǵan aýyr naýqastan dúnıe saldy.
Bul týraly «Abaı.kz» aqparattyq portaly habarlady.
1932 jyly jeti jasynda Goloşekın asharshylyǵy kezinde jurtpen birge shekara asyp, Qytaı jerine ótken ol Sháýeshek qalasynda turaqtaıdy. 50-jyldardyń sońyna qaraı Qytaıda bastalǵan mádenı tóńkeris naýqany kezinde qýǵyn-súrginge ushyrap, saıası tutqyn retinde sottalyp, Taklamakan shólindegi Tarym túrmesinde 20 jyl jatady. Odan shyqqannan keıin Keńester Odaǵynyń tyńshysy degen jalamen Úrimshi túrmesinde taǵy 15 jylyn ótkizdi.
Ómiriniń 40 jyldaı ýaqytyn abaqtyda ótkizgen taǵdyrly jazýshy Qytaı Halyq Respýblıkasynda «saıası qylmysker» atandy. Osynsha aýyr taǵdyryn sýretteıtin, búginde halyq arasynda keń taralǵan 6 tomdyq «Qylmys» romanyn jazyp shyqqan edi.
