Qytaıdaǵy Gran-prıge Qazaqstannan toǵyz ziltemirshi qatysady

Qytaıda aýyr atletıka boıynsha Gran-prı Rıodaǵy Olımpıada oıyndarynyń aldyndaǵy lıtsenzııalyq báseke mártebesine ıe. Qazaqstannan bul týrnırge toǵyz sportshy qatysady: Farhad Harkı (69 keli), Kım Aleksandr (69 kg), Pavlov Kırıll (77 kg), Kazov Aıdar (77 kg), Lınder Semen (85 keli), Nıdjat Ragımov (85 keli), Sádýaqasova Sáýle (63 keli), Sıvanbaeva Faına (69 keli), Sadyqova Ásem (69 keli).

«Bul týrnır lıtsenzııalyq bolyp tabylady. Sondyqtan negizgi mindetimiz alda ótetin Rıodaǵy Olımpıada oıyndaryna joldama alý. Júıe bylaı: Olımpıadaǵa qatysý úshin kem degende eki lıtsenzııalyq oıynǵa qatysý qajet. Ótken jyly bizdiń jigitter Azııa oıyndaryna, Álem chempıonatyna qatysty, bıyl Perýdegi jastarǵa arnalǵan Álem chempıonaty ótti, alda Qytaıdaǵy Gran-prı. Hıýstonda ÁCh jáne osy jylǵy jeltoqsanda Groznyıda lıtsenzııalyq týrnır ótedi. 2016 jyly Olımpıada oıyndary aldynda Samarqandtaǵy Azııa chempıonatynda jetpeı qalǵan baldardy alý múmkindigimiz bar. Al ol jerde Olımpıadaǵa tolyq daıyndyq bastalady. Sondyqtan osy jyly eki ball qosýymyz qajet. Sportshylardy salmaq sanaty boıynsha úsh topqa bóldik: bireýi Qytaıǵa (erler 85 kelige deıin, áıelder 69 kelige deıin), ekinshisi Álem chempıonatyna daıyndalýda, úshinshisi Groznyıda óz kúshin synaıtyn bolady (erlerde 94 keli jáne odan joǵary, áıelder 75 keli jáne odan joǵary)», - dedi aldaǵy ótetin jarystar jaıly Qazaqstan aýyr atletıka boıynsha ulttyq quramanyń bas bapkeri Alekseı Nı.

Onyń aıtýynsha, Qytaıǵa kúlli álemnen jınalady, uıymdastyrýshylar syılyqqa - 8000, 5000 jáne tıisinshe 3000 dollar bólip otyr.

«Bul týrnırde arnaıy talap qoımaımyz. Bul sportshylardyń tanyp-bilý, bapkerlik shtabtyń barlaý joly. ÁCh quramyn, kim, qansha kóteretinin baǵamdaımyz»,- dep atap ótti A. Nı.