Qytaıdaǵy eń úzdik aktrısa atanǵan qazaq qyzy kim
Osynaý eń joǵary marapatqa alǵash ret etınıkalyq qazaq qyzy Rıza Álimjanqyzy «Minning Town» telehıkaıasyndaǵy róli úshin «Úzdik aktrısa» nomınatsııasynyń ıegeri atandy. Qytaıdyń kıno juldyzyna aınalǵan, óner órinde mıllıondaǵan básekelesteriniń aldyn orap, talantymen talaıdy tańdaı qaqtyryp júrgen qandasymyz Rıza Álimjanqyzynyń óner joly týraly sholýymyzdy usynamyz, dep habarlaıdy QazAqparat.
Ashyq derekkóz boıynsha, Qytaıda ónerimen kórermen kózaıymyna aınalǵan Rıza Álimjanqyzy kıno salasynda Reyizha Alimjan nemese Rayza degen esimimen tanymal bolǵan. Ol 1986 jyly 15 shildede Beıjiń qalasynda dúnıege kelgen. Ákesi Álimjan Nurǵazyuly men anasy Zaıymhan Beıjiń qalasyndaǵy ortalyq ulttar baspasynyń qazaq redaktsııasynda jumys isteıdi. Olar 1970 jyldary Shyńjannan Beıjińge stýdent bolyp baryp, jumys istep, qonystanyp qalǵan eken.
Rıza Beıjińde alǵash mektepke barǵanda synyptastary túr-sıpaty ózderinen ózgeshe, erekshe balaǵa jatyrqap qarap, Shyńjan ólkesinen kelgenin bilip, «káýapshy» (shashylyq pisirýshi) dep at qoıǵan. Muny túsine almaǵan Rıza anasynan sebebin suraǵanda, anasy «balam, tek oqýyńdy jaqsy oqy, bilimdi, jaqsy bala bolsań, eldiń barlyǵy saǵan qurmetpen qaraıtyn bolady» deıdi. Bul sóz onyń jigerin janyp, jan-jaqty talaptanýyna oń áserin tıgizedi.
Rıza án aıtýǵa, kitap oqýǵa yntaly bolýymen birge, mektepte sabaǵyn da úzdik oqyǵan. Ol 15 jasynda sán álemine kezdeısoq qadam basyp, tanymal «Ruili» jýrnaly uıymdastyrǵan sán baıqaýyna qatysyp júldeger atanady. Osylaısha Rıza «Ruili» jýrnalynyń tarıhyndaǵy muqabasyna sýreti basylǵan eń jas model bolýmen birge, 3 jyl osy basylymda kelisimshartpen jumys isteıdi.
Áıtsede, Rıza model bolýdan kóri akter bolýǵa yntaly bolyp, 2002 jyly Beıjiń kıno akademııasynyń akterlik fakýltetine oqýǵa túsedi. Ol kásibı bilim alyp, oqýyn aıaqtaǵan soń «Kartańyzdy ashyńyz» fılmine túsip, kıno ındýstrııasyndaǵy tuńǵysh óner saparyn bastaıdy.
Osydan keıin talanytty qandasymyz aýdıtorııasy úlken Qytaıdyń kıno ındýstrııasyna qulash uryp, óz qoltańbasymen kórermen yqylasyna bólengen kóptegen fılmderge túsedi. Ol komedııalyq «Sýaıttar shaıqasy» kınosynda, patsha ordasyndaǵy qyryqpyshaq bolyp qyrylysyp jatatyn kúndes hanymdar týraly «Garemdegi Chjýan Hýannyń ómiri» telehıkaıasynda, búgingi qala ómirindegi mahabbat taqyryby arqaý bolǵan «Mahabbat pa, oǵan men daıyn» telefılminde jáne «Mahabbat buıryqtan asa almaıdy», «Biz ǵana biletin meken» («Somewhere Only We Know»), «Shyndyq aıtylmaıtyn aımaq», «Qarly daladaǵy áıel patsha», «Qýǵyndaý» sekildi kóptegen fılmde rólin sátti somdap shyǵady.
Rıza 2017 jyly «Qýǵyndaý» fılimindegi róli úshin XX Shanhaı halyqaralyq kıno festıvalinde «BAQ-tyń nazaryn jıi aýdarǵan aktrısa» nomınatsııasynda marapattalady.
Al, 2019 jyly «Chańandaǵy bir táýlik» atty telefılmindegi róli úshin Qytaıdyń Huading baıqaýynda eń «úzdik aktrısa» atanady.
Sondaı-aq, Rızanyń 2020 jyly túsken «Taý-teńizdeı mahabbat» fılmi 2021 jyldyń qańtar aıynda kórermenge jol tartyp, halyqtyń jaqsy baǵasyna ıe boldy. Al, Rıza sońǵy qýanyshty jańalyǵyn kópshilikpen Weibo jelisinde bólisip, óziniń ana atanyp, qyzy dúnıege kelgenin jarııalaǵan.
«Minning Town» telehıkaıasy ótken jyly qańtar aıynda Qytaıdaǵy kórermeni eń kóp bes telearnada qatar kórsetilip, jurt óte joǵary baǵalaǵan edi. Oǵan Qytaıdyń Nınsıa dúngen avtonomııalyq regıonynyń Sıhaıgý aımaǵyndaǵy aýyl turǵyndarynyń kedeılikpen kúresi arqaý bolady. Telehıkaıada Rıza qazymyr ákeniń qatal úkimine moıyn usynbaı, taǵdyryn óz qolyna alǵan qaısar qyz Lı Shýıhýanyń beınesin somdap, akterlik sheberligimen kórermenderdi tánti etedi.
1 qarasha kúni keshte Beıjińdegi Shoýgan arenasynda ótken syılyq ıegerlerin marapattaý rásiminde Rıza Álimjanqyzy tolqyp turyp:
«Men baqytty hám talaıly jan ekenmin. Qazylar alqasyna, eńbegimdi baǵalaǵan kórermenderge myń alǵys. Ózderińizge ana tilimde alǵysymdy bildirýge ruqsat etińizder: RAHMET!»,- dep aǵynan jaryldy.
Aıta keteıik, Rıza Álimjanqyzy bul syılyq taǵaıyndalǵaly beri «úzdik aktrısa» ataǵyn alǵan tuńǵysh qazaq qyzy bolyp otyr.
