Qytaıdaǵy altyn óndirisi 2017 jyly birden 9%-ǵa tómendegen
ASTANA. QazAqparat - Álemdegi eń iri altyn óndirýshi el Qytaıdyń altyn óndirisi ótken jyly 9%-ǵa azaıdy. Qytaıda altyn óndirý 1980 jyldan beri nebári ekinshi ret tómendep otyr, dep habarlaıdy Financial Times.
Dúnıejúzilik altyn keńesiniń (World Gold Council) málimetteri boıynsha, 2008 jyldan beri álemdik altyn qory jyl saıyn artyp kelgen edi. Alaıda, ótken jyly bul ósim toqtap qaldy.
Álemdegi altyn óndirisiniń shamamen 15% Qytaıdyń úlesinde. Bul proportsııa, mysaly Saýd Arabııasynyń munaı naryǵyndaǵy úlesine qaraǵanda da joǵary.
Alaıda, 2016 jyldan bastap, qytaılyq bılik altyn óndirý salasyna shekteý engizip, birqatar shaǵyn altyn kenishterin jaýyp tastady.
Dúnıejúzilik altyn keńesiniń marketıngtik barlaý bóliminiń bastyǵy Alıster Hıýıttiń aıtýy boıynsha, qytaılyq bılik ekologııalyq máselelerge kóbirek nazar aýdara bastaǵan. «Altyn óndirisi qatań rettelýde», - dedi ol.
Dúnıejúzilik altyn keńesiniń málimetteri boıynsha, ótken jylǵy Qytaıdyń altyn óndirisi 420,5 tonnany quraǵan. Qytaıda altynǵa degen suranys sol kezeńde 4%-ǵa artyp, 953,3 tonnaǵa jetken.
2017 jyly álemdik altyn óndirisi 3268,7 tonnaǵa deıin ósti. 2016 jylǵy bul kórsetkish 3263 tonna bolatyn. Bul 2008 jyldan beri eń az ósim. Sońǵy ret 2008 jylǵy qarjy daǵdarysy kezinde altyn óndirisi 2% -ǵa tómendeǵen edi.
2017 jyldyń basynan altynnyń baǵasy 15%-ǵa ósti, 1 ýntsııa altyn baǵasy - 1 334,78 dollar.
Qytaıdyń altyny negizinen ishki suranysty qanaǵattandyrý úshin paıdalanylady, óıtkeni Qytaı bıligi kompanııalarǵa altyndy eksporttaýǵa ruqsat bermeıdi.
Qytaıdaǵy zańnama qataıtylǵan soń bul eldiń altyn óndirýshi kompanııalary sheteldegi kenishterdi satyp alýǵa kóbirek kóńil bóle bastady. Atap aıtqanda, «Shandong Gold Mining» kompanııasy «Barrick Gold» kompanııasynan Argentınadaǵy Valero altyn kenishiniń 50% aktsııasyn satyp alǵan.
