Qytaıda zoopark aıýlardyń kıinip alǵan adam emes, tiri aıý ekenin dáleldeýge májbúr boldy

ASTANA. QazAqparat – Qytaı zoobaǵy vıdeodaǵy aıýdyń kostıým kıgen adam emes, tiri aıý ekenin túsindirýge májbúr boldy, dep habarlaıdy QazAqparat VVS-ge silteme jasap.

Qytaıdyń Hanchjoý qalasyndaǵy zoobaǵy jurtqa malaı aıýlarynyń kostıým kıip alǵan adamdar emes, tiri aıý ekenin túsindirýge májbúr boldy.

Oǵan ınternette jarııalaǵan vıdeo sebep bolǵan. Onda aıýlardyń biri turyp turǵan adamǵa uqsaıdy.

Áleýmettik jeli qoldanýshylarynyń kóbi ony adam dep oılaǵan. Oǵan jaýap retinde Hanchjoý zoobaǵy ókilderi adamdar aıýdyń bul túrin kóp bile bermeıtinin málimdedi.

Vıdeoda volerdiń shetinde turyp, adamdardy baqylap tur.

Áleýmettik jeli qoldanýshylary aıý tabanynyń ushymen tip-tike turǵanyna tańǵalysty. Sondaı-aq, onyń júni de aıý kostıýmine uqsaǵandaı kóringen.

Zoobaq qyzmetkerleri aıýdyń atynan mynadaı málimdeme jarııalady: «Keıbir adamdar meni adam sııaqty dep oılaıdy... Biraq, sizder meni jaqsy bilmeıtin sekildisizder».

«Aıýlar týraly sóz qozǵalsa, úlken ári myqty fıgýra elesteıdi... Biraq, barlyq aıý ondaı alyp, qaýipti emes», - delingen málimdemede.

Haıýanattar baǵynyń ókilderi malaı aıýlary, olardy «kún aıýlary» dep te ataıdy nemese bırýangtar - aıýlardyń eń kishkentaı túri ekenin eske saldy: olar ádette úlken ıtpen shamalas, denesiniń uzyndyǵy bir jarym metrge deıin jetedi.

Bul Ońtústik-Shyǵys Azııanyń tropıkalyq ormandarynda kezdesetin joıylyp bara jatqan túri.