Qytaıda jylyna qazaq avtorlarynyń 30 myńǵa jýyq kitaby jaryq kóredi - Ǵalııa Bókeıqyzy

ASTANA.QazAqparat - Qytaıdaǵy Shyńjań-Uıǵyr avtonomııalyq ólkesinde jylyna josparly túrde 100 myń atalymmen jańa kitap jaryq kórse, sonyń 30 myńǵa jýyǵy - qazaq avtorlarynyń týyndysy. Bul týraly QazAqparat tilshisine QR Ulttyq akademııalyq kitaphanasy bas dırektorynyń birinshi orynbasary Ǵalııa Bókeıqyzy málim etti.

«Qazaq qalamgerleriniń kitaptaryn jarnamalaý jaǵy áli de kóńilge qonymsyz desem ótirik emes. Elimizdegilerdi erte me, kesh pe eptep jınap alarmyz degen jeleýmen otandyq baspalardan tegin jetkizilýge tıis mindetti danalarymyzdy túgendeýdi qoıa turyp, shetelde shyǵarylǵan qundy basylymdardy (qaı tilde bolsa da) jetkizýdiń de jóni bolar. Endi mynaǵan qarańyz, qazaq kóp qonystanǵan kórshi Qytaıdaǵy Shyńjań-Uıǵyr avtonomııalyq ólkesiniń ózinde jylyna josparly túrde 100 myń atalymmen jańa kitap jaryq kórse, sonyń 30 myńǵa jýyǵy - qazaq avtorlarynyń týyndysy eken. Ókinishke oraı, sol sý jańa shyǵarmalar arab qarpimen, ıaǵnı tóte jazýmen (keıde qytaı tilinde) jarııalanady. Tórimizge qondyryp, sórede tilin túsinetin oqyrman tappaı tura ma degen kúdik kim-kimdi de jeńbeı me?.. Menińshe, memlekettik komıssııa saraptamasynan ótken, oqyrmanǵa qajetti degen shyǵarmalardy jetkizsek, utymdy jol sol bolar», - deıdi Ǵalııa Bókeıqyzy.

Kúnsultan Otarbaı