Qytaıda jyldamdyǵy 400 km/s bolatyn júrdek poıyz jasalady
ASTANA. QazAqparat - Qytaıdyń temirjol jyljymaly quramy korporatsııasy (CRRC) 2020 jylǵa qaraı jyldamdyǵy 400 km/saǵatqa jetetin óte jyldam poıyz jasap shyǵarmaq. Bul týraly TASS China Daily gazetine silteme jasap habarlady.
«Poıyzdy jasaý barysynda kómirtekti talshyqtar men alıýmınıı qorytpasy syndy jańa materıaldardy qoldanýdamyz. Olar salmaqtyq júktemeni azaıtyp, energetıkalyq tıimdiligin arttyrýǵa múmkindik beredi», - dedi CRRC-ǵa qarasty jáne jobaǵa jetekshilik etýshi Chanchýn temirjol kóligi kompanııasynyń bas ınjeneri Tsıao Fen.
Injenerdiń aıtýynsha, jańa poıyz jyldamdyǵy 350 km/saǵatqa jetetin qoldanystaǵy lokomotıvpen salystyrǵanda, ár jolaýshynyń ortasha energııa tutyný kórsetkishin 10%-ǵa tómendetedi.
