Qytaıda júrgen qazaqstandyqtar joıqyndy daýyldar jóninde eskertildi
ASTANA. QazAqparat - Qytaıda júrgen Qazaqstan azamattaryna tónip kele jatqan «Sarıka» jáne «Haıma» daýyldarynyń qaýpi jóninde eskertildi, dep habarlaıdy QazAqparat.
QR Investıtsııalar jáne damý mınıstrligi Týrızm ındýstrııasy departamentiniń dırektory Marat Iǵalıdiń habarlaýynsha, Qazaqstan azamattary tosyn jaǵdaıǵa jáne jazataıym oqıǵalarǵa dýshar bolmaýy úshin qaýipsizdik sharalaryn saqtaýlary tıis.
«Qazaqstan Respýblıkasynyń Investıtsııalar jáne damý mınıstrliginiń Týrızm ındýstrııasy departamenti sý surapylynyń astynda qalǵan QHR ólkelerinde júrgen qazaqstandyq týrısterge jazataıym oqıǵalar men tosyn jaıttarǵa tap bolmaýy úshin barynsha abaı bolyp, jergilikti bılik nusaqaýlaryn oryndaýǵa keńes beredi.
Sonymen qatar QR IDM Týrızm ındýstrııasy departamenti Ońtústik-Shyǵys Azııaǵa saparlaýdy josparlap otyrǵan qazaqstandyqtardy meteorologııalyq ahýaldy, sınoptıkterdiń boljamyn jáne tótenshe jaǵdaılardan qorǵaý qyzmetteriniń eskertýlerin habarlaýǵa, al atalǵan óńirge týrlar uıymdastyrýshy týrıstik operatorlarǵa óz klıentterin aýa raıy jaǵdaıy men oǵan baılanysty táýekelder týraly aqparat berýge shaqyrady», - dep jazdy Iǵalı Feısbýktegi paraqshasynda.
Aıta keteıik, álemdik BAQ málimetterine sáıkes, qytaılyq Haınan ólkesinde «Sarıka» taıfýny saldarynan jergilikti Haıkoý qalasynyń «Meılan» áýejaıynan shamamen 250 reıs ushyrylmaıtyn boldy.
«Sarıka» taıfýny Tsıýnhaı men Sanıa qalalarynyń arasynda bolmaq. Onyń qýattylyǵy sýpertaıfýndikimen teńesip, sońǵy on jylda aralda bolǵan iri tabıǵı apatqa aınalýy múmkin.
