Qytaıda jol apatynda 60-tan astam adam mert boldy
BEIJІŃ. 3 aqpan. QazAqparat - Qytaıda sońǵy eki kúnde jol-kólik apattarynda 60-tan astam adam kóz jumdy.
Qytaıdyń Ońtústik-Batysynda oryn alǵan eki jol apatynda 25 adam mert bolyp, 43-i jaraqattandy. Tótenshe jaǵdaılardyń sebepteri qaýipsizdik erejelerin buzý, sondaı-aq jolaýshylar avtobýstaryndaǵy adamdar sanynyń shamadan tys kóp bolýy.
Juma, 1 aqpan kúni Gansý provıntsııasynda (Qytaıdyń Soltústik-Batysy) adamdardyń shamadan artyq otyrǵyzylýynan avtobýs jyraǵa qulap ketip, órtene bastady. Saldarynan 18 adam qaza boldy, 34-i túrli dárejedegi jaraqattar aldy. Osy kúni Sychýan provıntsııasynda (Qytaıdyń Ońtústik-Batysy) jol apatynda 11 adam mert bolyp, 18-i zardap shekti.
Jergilikti BAQ-tardyń habarlaýynsha, bul apattar elde «uly kóshi-qon» bastaý alǵan Qytaı Jańa jylynyń (Kóktem merekesi, bıyl ol 10 aqpanǵa túsedi) qarsańynda boldy. Ol jyl saıyn bolady jáne álem halqynyń eń iri kóshi-qony sanalady.
QHR Memjosparynyń málimetterine sáıkes, Kóktem merekesi kezinde materıktik Qytaıdyń ishinde 3,41 mlrd. sapar jasalady dep kútilýde. Saparlardyń 99 paıyzy temirjol jáne avtomobıl kólikteriniń úlesinde. Bul rette, tek 225 mıllıon «qytaılyq mıgrant» temir jol qyzmetin paıdalanady, al jolaýshylardyń qalǵan basym bóligi (3,1 mlrd. adam) halyqaralyq avtobýs baǵyttaryn tańdaǵan.
Jolda júrý erejelerin saqtamaý, jyldamdyqty asyrý, kólikke otyrǵyzylatyn adamdar sanyn arttyrý jáne aýa raıynyń qolaısyz jaǵdaıynda taýly aýmaqtarda júrý mashyqtarynyń jetkiliksizdigi jyldyń bul kezeńinde jol-kólik apattaryna alyp keledi.
