Qytaıda joǵary qalyńmal jastardyń ýaqtyly úılenýine kedergi bolyp otyr

BEIJІŃ. QazAqparat – Qytaı bıligi qymbat qalyńmal men úılený toılaryn sán-saltanatpen ótkizýge qarsy kúres naýqanyn bastady. Naýqan 2023 jyldyń jeltoqsan aıyna deıin jalǵasady. Bul týraly Qytaı Halyq Respýblıkasynyń Aýyl sharýashylyǵy jáne aýyldyq ister mınıstrligi taratqan málimdemede aıtylǵan, dep habarlaıdy QazAqparat.

Naýqan aýyl turǵyndary úshin úılený toılary, banketter men quda túsý syılyqtaryn uıymdastyrýǵa jumsalatyn shyǵyndy azaıtýdy kózdeıdi.

Kúıeý jigit otbasynyń qalyńdyq úshin óteıtin quny kóbine shamadan tys somaǵa jetip, ásirese aýylda turatyn qytaı otbasylaryna aýyr júk túsirip otyr.

«Chjýngo Jıbao» basylymynyń jazýynsha, Gansý provıntsııasynyń (Soltústik-Batys Qytaı) Chjennın ýezinen kelgen bolashaq kúıeý jigit sáýir aıynda jergilikti ákimshilikke qalyńmaldyń qymbattaýyn tómendetý sharalaryn qoldanýdy suraǵan.

Ol basyna túsken jaıtty baıandap, bolashaq jarynyń ata-anasy qalyńdyq úshin shamamen 45 myń dollar aqsha talap etkendikten ekeýi qosyla almaǵanyn aıtty.

Chjennın ýeziniń ákimshiligi buǵan jaýap retinde aýyldyq jerde qalyńmaldy 11 myń dollardan asyrmaı kerektigin eskertip habarlandyrý jarııalady.

«Hýantsıý Shıbao» basylymy 2021 jyly Qytaıda neke qıǵandar sany 2003 jylǵy deńgeıge deıin tómendegenin jazdy. Ótken jyly Qytaıda nekesin tek 7,64 mln adam tirkegen.

Sońǵy jyldary Qytaıda neke jasyndaǵylar sany azaıyp, kóbine kesh úılengender qatary kóbeıip keledi.

Qytaı demograftary neke tirkeýdiń azaıýy eldegi týý kórsetkishiniń tómendeýine ákeletinin eskertip otyr.

Foto: hunliji.com