Qytaıda Jibek jolynyń BAQ Odaǵy quryldy
NANKIN. QazAqparat - Nankın qalasyndaǵy Jibek joly buqaralyq aqparat quraldary yntymaqtastyǵynyń alǵashqy forýmynyń qorytyndysy boıynsha «Nankın konsensýsy» qabyldandy, ol Jibek jolynyń BAQ Odaǵy («Silk Road Media Alliance» - SRMA) qurylýyn qarastyrady, dep habarlaıdy Qytaıdaǵy QazAqparat tilshisi.
Qujattyń mátinin «QazAqparat» halyqaralyq aqparattyq agenttiginiń bas dırektory Ásel Tólegenova oqyp shyqty.
Qujatta BAQ arasynda «Bir beldeý, bir jol» elderi arasyndaǵy túrli dıalogtar uıymdastyrý, aqparat jáne mass-medıa salasyndaǵy tehnologııamen almasý, birlesken suhbattar qurý kózdelgen.
Aıta keteıik, Forým «EKSPO álemniń tarıhı jáne mádenı qalalary» aıasynda ótip jatyr. Ony Qytaıdyń shet tilderdegi ádebıetter baspa basqarmasy men «Jenmın hýabao» (China Pictorial) baspasynyń qoldaýymen jáne járdemdesýimen Nankın úkimeti uıymdastyrdy, dep habarlady Nankın baspasóz keńsesi jáne Nankın radıo habar taratý, kınematografııa jáne televıdenıe korporatsııasy.
Forýmnyń basty taqyryby - «Pikir birtutastyǵy, birlesken qurylys, ortaq kúshterdiń jemisin paıdalaný: «Bir beldeý, bir jol» aıasynda BAQ yntymaqtastyǵy. Oǵan «Bir beldeý, bir jol» mańynda ornalasqan 13 elden 20 medıa qurylym ókilderi qatysady».
Shara úsh paneldi pikirtalas ótkizýdi kózdeıdi: «Jibek jolynyń birlesken qurylysy aıasynda BAQ yntymaqtastyǵynyń jańa múmkindikteri, syn-tegeýrinderi», «BAQ halyqtardyń ózara túsinistigin qalaı nyǵaıtady», «Bir beldeý, bir jol» qalalarynyń úlgileri», halyqaralyq arenada mádenı bilimderdi taratý».Forýmnyń eki sessııasynda «Komsomolskaıa pravda - Kazahstan» gazetiniń bas dırektory Asylbek Bısenbaev pen «QazAqparat» halyqaralyq aqparattyq agenttiginiń bas dırektory Ásel Tólegenova sóz sóıledi.
