Qytaıda jemqorlardy qalaı atqanyn kórdim – Memleket basshysy
Reseılik jýrnalıst Alekseı Pıvovarpen suhbat barysynda QR Prezıdenti jemqorlyq úshin ólim jazasyna kesilgenderdi óz kózimen kórgenin jetkizdi.
«Bir ret jemqorlyqpen ustalǵan adamdardyń stadıonda atylǵanyn kórdim. Ondaı da bolǵan. Áseri aýyr endi. Júk mashınasynan kózderi baılaýly adamdardy túsirip ákeldi de, úkimderin oqyp shyqty. Ár adamnyń jelkesinen atty. Bul 1988 jyly Qytaıdyń ońtústigindegi qalalardyń birinde boldy», - dep eske aldy Prezıdent.
Qasym-Jomart Toqaev mundaı jazaǵa qatysty óziniń pikirin bildirdi.
«Bir jaǵynan mundaıdy kórýdiń ózi aýyr. Ekinshi jaǵynan synap ta otyrǵan joqpyn. Bul sol memlekettiń tarıhı jáne mádenı dástúri. Eger osyndaı tásil qoldanbasa, eldegi jaǵdaıdy baqylaýda ustaı almaý qalýy múmkin. Aıtpaqshy, ol jaqta tek jemqorlyq úshin ǵana emes, tonaý, qaraqshylyq, zorlyq kórsetý sııaqty qylmystar úshin de atý jazasy qoldanylady», - dedi Prezıdent.
Aıta keteıik, Qasym-Jomart Toqaev «31» arnadan júrip jatqan «Prezıdent 2.0» derekti fılminde Prezıdent laýazymyna qalaı boı úıretkenin de aıtty.