Qytaıda jeke derekterdi saýdalady degen kúdikpen 13 adam ustaldy
ASTANA. QazAqparat - Qytaıda 4 mln jeke derekti zańsyz satqany úshin on úsh adam ustaldy, dep habarlaıdy Sınhýa.
Bul is Henshýı qalasynda turatyn Van atty er adamnyń 2016 jyldyń sońynda kóptegen jaǵymsyz qońyraýlardy alǵannan keıin qozǵalǵan. Ol óziniń jeke derekteriniń bóten bireýlerdiń qolynda bolǵanynan kúdiktengen. Bıyl naýryz aıynda ol onlaın-áleýmettik jeliden azamattardyń jeke aqparattaryn saýdalaý úshin ashylǵan eki topty taýyp alady. Ol dálel retinde 500 ıýange 40 myń jeke derek satyp alyp, bul týraly polıtsııaǵa habarlaıdy.
Polıtsııa Shıtszıanchjýan jáne Henshýı qalalarynan eki kúdiktini anyqtap, mamyr aıynyń sońynda ustaıdy. Ary qaraı tergeý barysynda 11 adamnan turatyn top quryqtalady. Qaskúnemderdiń qolyna túsken on provıntsııada turatyn turǵyndardyń 4 mln jeke deregi alynǵan.
Tergeý nátıjesine sáıkes, eki kúdikti buryn bir kompanııada jumys istep, bireýi jumystan bosaǵannan keıin jeke aqparattardy saýdalaýmen aınalysqan. Olar derekterdi joǵaryda atalǵan 11 kúdiktige satqan, al olar odan ary qaraı basqa fırmalarǵa qaıta satyp shyqqan.
Qytaıdyń Qylmystyq kodeksine sáıkes, jeke aqparattardy satý jáne alý boıynsha aıyptalǵan tulǵalar «asa aýyr jaǵdaıda» jeti jylǵa deıin bas bostandyǵynan aıyrylady. Jańa sot túsindirmesine saı, «asa aýyr» jaǵdaı dep ózara jazysqan 5000 hat-habar, turǵylyqty mekenjaıy týraly, densaýlyǵy men azamattardyń tranzaktsııalary jaıly derekterdi berý nemese satý zańsyz alý bolyp sanalady. Qazirgi tańda tergeý jalǵasýda.
