Qytaıda jasalǵan koronavırýsqa qarsy vaktsına áskerı preparat dep tanyldy

BEIJІŃ. QazAqparat - Qytaıdyń jeke jáne áskerı ǵylymı-zertteý ınstıtýttary birge jasap shyǵarǵan koronavırýsqa qarsy Ad5-nCoV vaktsınasyn Ortalyq áskerı keńes maquldady. Ol budan bylaı «arnaıy áskerı preparat» retinde Qytaı áskerinde qoldanylatyn boldy, dep habarlaıdy QazAqparat jergilikti Global Times agenttigine silteme jasap.

QHR Ortalyq áskerı keńesi materıaldyq-tehnıkalyq qamtamasyz etýdiń birikken kúshterine qarasty gıgıena jáne densaýlyq saqtaý máseleleri basqarmasy rekombınatty ekpeni bir jylǵa paıdalanýǵa ruqsat berdi.

«Bul vaktsına áskerde ǵana qoldanylady, al kópshilik qaýymnyń paıdalanýy úshin QHR Ortalyq áskerı keńesi tıisti departamentiniń ruqsatyn alý kerek» dep jazady Global Times.

BAQ ókilderiniń habarlaýynsha, jalpy klınıkalyq nátıje Ad5-nCoV vaktsınasynyń SARS-CoV-2 vırýsynan týyndaıtyn aýrýlardyń aldyn alýǵa shamasy jetetinin kórsetip otyr.

Ad5-nCoV ekpesiniń klınıkalyq testiden ótkizýdiń birinshi jáne ekinshi satysy Qytaıda ótken. Test nátıjesi qaýipsizdiktiń jaqsy deńgeıin jáne gýmoraldy jáne jasýshalyq ımmýndyq jaýaptyń joǵary deńgeıin kórsetken.

Aıta keteıik, koronavırýsqa qarsy Ad5-nCoV ekpesin qytaılyq CanSino Biologics kompanııasy men Qytaı halyq-azattyq áskeriniń áskerı-medıtsınalyq ǵylymdar akademııasy birge jasap shyǵardy.

Avtor: Rýslan Súleımenov