Qytaıda jabaıy qabandar qora toly qoıdy jaryp ketti
ASTANA. QazAqparat - QHR Іle qazaq avtonomııaly oblysy, Kúnes aýdanynyń Qaraterek, Sarshoqy qatarly óńirlerindegi shopandar qorasyna ashyqqan jabaıy qabandar kirip, usaq maldaryn jaryp ketetin oqıǵalar jıilep ketti, dep jazady «Shynjań» gazeti.
«Jergilikti shopandardyń aıtýyna qaraǵanda, únemi toptasyp júretin jabaıy shoshqalar kóktem men qysta qoraǵa kirip maldy shyǵyndasa, jazda tabıǵı jaıylymdy qazǵylap, shabyndyqty búldirip ketetin bolǵan.Osydan 2 jyl buryn Kúnes aýdanynyń turǵyny Ysraıyl men Aqylbektiń qorasyn syndyryp kirgen jabaıy qabandar 30 qozy men 6 saýlyq qoıyn jaryp ketken. Bul sekildi oqıǵalar sońǵy kezde jıilemese azaımaı otyr. Tipti, Narat óńirinde jabaıy shoshqa adam jaraqattap, kisi jazym bolǵan jaǵdaı da kezdesken. Sońǵy jyldary úkimettiń jabaıy haıýanattardy qorǵaý tebinin arttyrýyna baılanysty, ormandy óńirlerdegi qońyr ańnyń sany qaýyrt kóbeıip, jaıylym ekologııasynyń búlinýine óz áserin tıgizse, qasqyr, jabaıy shoshqa sııaqty jyrtqysh ańdardyń mal sharýashylyǵyna tıgizetin zııany da kún saıyn artyp keledi», dep jazady atalmysh basylym.
Memleket jaǵynan qorǵalatyn haıýanattar turǵyndardyń malyna shabatyn bolsa, onyń shyǵynyn kim óteýi kerek? Gazet osy suraqtardyń jaýabyn izdep, zań mamandarynyń keńesine júgingen. Zańgerler memleket jaǵynan qorǵalatyn aıý, qasqyr, jabaıy shoshqa tektes jyrtqysh haıýanattar turǵyndardyń malyn jep ketse nemese túrlishe dárejede ekonomıkalyq shyǵyn ákelse, onda osyǵan qatysty Qytaı zańdarynda qarastyrylǵan belgilemeler negizinde tıisti memlekettik mekemelerge, keltirilgen shyǵyn týraly aryz jazýǵa quqyly ekenin aıtady.
