Qytaıda zeınetke shyǵý jasy ulǵaıtylmaq
ASTANA. QazAqparat - Qytaı bıligi halyqtyń zeınetke shyǵý jasyn ulǵaıtýdy josparlap otyr, dep jazady 24.kz.
Búginde bul elde er-azamattar - 60, al áıelder jumys istegen salasyna qaraı 50-55 jasynda qurmetti demalysyna shyǵady. Ázirge jańa zeınet jasyna qansha jyl qosylatyny belgisiz. Belgilisi - bılik osynyń arqasynda úsh negizgi máseleni sheshpekshi. Olar: jumys kúshiniń jetispeýshiligi, zeınetaqy qoryna túsetin salmaq jáne ekonomıka damýyn qalypty ustaý.
Qytaıdyń Eńbek resýrstary jáne áleýmettik qamtamasyz etý mınıstrliginiń zertteýshisi Tszın Veıgannyń málimeti boıynsha, 2015 jyly 16-60 jas aralyǵyndaǵy Qytaı turǵyndarynyń sany 5 mln adamǵa deıin qysqarǵan. 70-inshi jyldary engizilgen «bir otbasyǵa - bir bala» saıasaty júrgizilgendikten, eńbekke qabiletti jastar sany da osynsha kemipti. Búginde Qytaıda jasy 60-ty eńsergen azamattar sany 200 mıllıonnan asady. Bul el turǵyndarynyń 16%-y eken.
Jaǵdaıdy rettemese, 2050 jylǵa qaraı atalmysh kórsetkish eki ese óspek. Jergilikti aqparat quraldary bul jospar besjyldyq ótpeli kezeńnen keıin, 2020 jylǵa qaraı iske asýy múmkin dep jazady. Al turǵyndar bolsa atalmysh jańalyqty árqalaı qabyldaýda.
