Qytaıda zaýyttaǵy jarylystan qaza tapqandardyń otbasylaryna ótemaqy tólenedi
ASTANA. QazAqparat - QHR tóraǵasy Sı Tszınpın Qytaıdyń shyǵysyndaǵy Tszıansý provıntsııasyndaǵy Kýnshan qalasynda zaýytta bolǵan jarylys saldarynan qaza tapqandardyń otbasylaryna materıaldyq kómek kórsetý týraly sheshim shyǵardy, dep habarlaıdy Sınhýa agenttigi.
Agenttiktiń aqparattaryna sáıkes, sońǵy málimetteri boıynsha 68 adam qurban bolǵan apat týraly estigen qytaı kóshbasshysy oqıǵanyń mán-jaıyn egjeı-tegjeıli tekserýdi tapsyrǵan. Al QHR memlekettik keńesiniń premeri Lı Ketsıan endi mundaı apatty boldyrmas úshin eldegi barlyq kásiporyndardy jospardan tys tekserýdi talap etken. Esterińizge sala keteıik, zaýyttaǵy jarylys senbi kúni jergilikti ýaqyt boıynsha tańǵy saǵat jeti jarymdar shamasynda metallýrgııa zaýytynyń ǵımarattarynyń birinde oryn alǵan. Bul sátte kásiporynda 264 adam bolǵan, olardyń 44-i oqıǵa ornynda kóz jumǵan. Al taǵy 24 adam aýrýhanaǵa jetkizilgen soń qaıtys bolǵan. Endi 137 adam basqa qalalardaǵy medıtsınalyq mekemelerge jetkizilgen. Aldyn ala málimetter boıynsha, jarylys óndiris barysynda aýada túzilgen shań-tozańnyń tutanýynan oryn alǵan.
