Qytaıda WhatsApp buǵattaldy
ASTANA. QazAqparat - Keń qoldanystaǵy WhatsApp messendjeri Qytaı aýmaǵynda buǵattaldy. The New York Times-qa silteme jasaǵan TASS osylaı habarlaıdy.
WhatsApp - amerıkalyq Facebook kompanııasyna tıesili mesendjer. Dál osy áleýmettik jeli Qytaıda 2009 jyly buǵattalǵan bolatyn. Basylymnyń jazýynsha, messendjer Facebook-tiń Qytaıda buǵattalmaǵan sanaýly servısteriniń biri edi.
Gazettiń málimetteri boıynsha, osy jyldyń shildesinen bastap Qytaıda WhatsApp-tyń vıdeochattary, sondaı-aq ol arqyly fotografııalar men basqa faıldardy jiberý fýnktsııasy buǵattalǵan. O basta mátindik habarlamalardy jóneltýge shekteý qoıylmaǵan bolatyn. Biraq Frantsııada ornalasqan málimetterdi shıfrlaýǵa mamandanǵan Symbolic Software kompanııasynyń sarapshysy Nadım Kobeısı qazir WhatsApp Qytaıdyń búkil aýmaǵynda jumys istemeı turǵanyn aıtady.
Kobeısıdiń sózine qaraǵanda, WhatsApp-tyń mátindik habarlamalaryn buǵattaý Qytaı tsenzýrasynyń messendjerde paıdalanylatyn málimetterdi shıfrlaý tehnologııasyna qaýqary jetetin arnaıy baǵdarlama jasaǵanyn bildirýi múmkin. Facebook kompanııasy bul máselege pikir bildirýden bas tartty.
2003 jyldan bastap Qytaıda «Altyn qalqan» júıesi (shetelderde «Uly Qytaı faervoly» degen atpen belgili) ornatylǵan. Ol qoldanýshylardyń saıttar men ınternet-qyzmetterge kirýin fıltrleıdi. Buǵan sáıkes, negizinen memleketke qarsy jáne «sezimtaldyǵy» joǵary saıttar men materıaldar buǵattalady. Budan tys, QHR úkimetiniń baqylaýynan syrt qalyp kele jatqan áleýmettik jelilerge, sondaı-aq qumar oıyndarymen baılanysty kontentterge kirý de shektelgen.
Qazirgi kezde Qytaıda buǵattalǵan veb-servısterdiń tiziminde: Google, Facebook, YouTube, Instagram, Twitter, «Ýıkıpedııanyń» barlyq tildegi saıttary, Amnesty International halyqaralyq quqyq qorǵaý uıymynyń saıty, shetelderdiń túrli BAQ-dyń resýrstary bar.
