Qytaıda uzaq ýaqyt saqtaýǵa bolatyn qymyz naryqqa shyqty

ASTANA. QazAqparat - Qytaıdyń Іle Qazaq avtonomııaly oblysynda «Arys» saýda belgisimen uzaq ýaqyt saqtaýǵa bolatyn qymyz naryqqa shyǵaryldy, dep jazady qytaılyq kazakcnr.com (CNR) saıty.

Atalǵan derekkózdiń habarlaýynsha, Іle Qazaq avtonomııaly oblysynyń Kúnes aýdanyndaǵy qymyz ónimin shyǵaratyn óndiris ortalyǵyna 3 mıllıon ıýan qarjy jumsalǵan.

Osy keshende «Arys» saýda belgisimen óndirilip jatqan qymyzdy 6 aıǵa deıin sapasyn joǵaltpaı saqtaýǵa bolady. Mundaǵy barlyq óndiris barysy avtomattandyrylǵan. Al qajetti ozyq tehnıkalardyń keıbirin Germanııadan tapsyryspen aldyrǵan. Naryqta 750 ml ydysqa quıylǵan «Arys» 28 ıýanǵa (teńgege shaqqanda 1500 teńge) satylsa, al 300 ml ydysqa quıylǵany 12 (650 teńge) ıýanǵa baǵalanǵan.

Kásiporyn jazǵy ýaqytta kúnine 10 tonna, qysta 1 tonnaǵa deıin qymyz daıyndap, saýdaǵa shyǵaryp jatyr.