Qytaıda «Ýsagı» daýylynan kem degende 25 adam qaza tapty
ASTANA. 23 qyrkúıek. QazAqparat - Qytaıdyń ońtústiginde Ýsagı daýyly turyp, halyqty ábden ábigerge saldy. Bul ádette osy maýsymda bolatyn eń kúshti tynyqmuhıt daýyly bolyp sanalady. Fılıppınnen ótkennen keıin daýyldyń jyldamdyǵy tómendegen, qazir 43 m/s quraıdy, dep jazady Newsru.com.
Chjýnsınshe agenttiginiń habarlaýynsha, Qytaıdyń ońtústiginde bolǵan «Ýsagı» daýylynan kem degende 25 adam qaza tapty (buǵan deıin 21 adam dep habarlanǵan). Gýandýn provıntsııasynyń Shantoý qalasynda eki adamdy qulaǵan aǵash basyp qalǵan, birneshe adam iz-tússiz joǵalyp ketken.
Gonkongta jarnama baǵanynyń qulaýynan zardap shekken áıel aýrýhanaǵa tústi. Al Taıvanda alapat daýyldan elektr symdary úzilgen. Aǵashtar qırap, elektr jelileri úzilýde, tipti kúshti jel avtokólikterdi de ushyryp áketken.
Gýanchjoý, Shenchjen jáne Chjýhaı sııaqty iri qalalarda poıyz qatynasy toqtady, Taıshan qalasynda 5 myńǵa jýyq týrıst qaýipsiz jerge kóshirildi. Sonymen qatar Gonkongtaǵy Chek Lap Kok halyqaralyq áýejaıynyń jumysy ýaqytsha toqtatylǵan. Munda 400-den asa reıstiń kestesi ózgerdi. Jergilik bılik mekteptegi sabaqtardy toqtatty.
Atalǵan taıfýn Tynyq muhıtynda paıda bolǵanda ǵalamdyq meteorologtar oǵan «sýpertaıfýn» degen ataý bergen.
