Qytaıda túrmede otyrǵan Aqjarqyn Turlybaıdyń aqtalýyna senim bar - qorǵaýshy
- Búginde 2600 sottalýshy sheteldik túrmelerde jatyr. Olardyń qatarynda Aqjarqyn Turlybaı men Reseı azamaty Marııa Dapırka bar. Eki istiń arasynda qandaı baılanys bar?
- Aqjarqyn men Marııa esirtki tasymaldady degen aıyppen sottaldy. Eki oqıǵa da 2014 jyly bolǵan. Gýanchjoý áýejaıynda Aqjarqynnyń sómkesinen polıtsııa 4,5 keli esirtki tapqan bolatyn. Budan sál az, 2,7 keli esirtkini Marııanyń sómkesinen Vetnam polıtsııasy tapty. Bul eki iste de qyzdar jazasyn shetelde ótep jatyr. Іsterdiń sońǵy sheshimi de uqsas aıaqtalýy múmkin. Qazaqstandyqtardyń kópshiligi 18 jastaǵy názik qyz jalǵyz ózi esirtki tasymaldady degenge senbeıdi. Onyń jaǵdaıy týraly ne aıtýǵa bolady? Árıne, oǵan qazir qıyn. Eresek er adamdar da túrmeniń jaǵdaıyn shydaı almaıdy. Azııa elderindegi túrmelerde tártip qatal. Aıta ketý kerek, Aqjarqyn Qytaıǵa alǵash ret shyqqan. Buryn onyń tólqujaty da bolmaǵan. Esirtkimen kúres Ortalyq Azııa óńirlik aqparattyq ortalyǵynyń habarlaýynsha, Aqjarqyn men Marııa Dapırka nıgerııalyq narkomafııanyń qurbany bolǵan.
Eki jaǵdaıda da transulttyq esirtki toby jumys istegeni kórinip tur. Olar burynǵy Keńes odaǵy elderindegi adamdardy esirtki bıznesine jegýmen aınalysyp júrgen. Qylmyskerler adamnyń senimine kiredi. Onymen mahabbat qurýy da múmkin. Aqjarqyn Almatydaǵy dámhanalardyń birinde daıashy bolyp jumys istegen. Barmen Djonnı de osy dámhanada qyzmet etken. Djonnı Aqjarqynǵa taýar jetkizip bershi dep ótinedi. Aqjarqynǵa QHR QK 374 babymen qylmys jasady degen aıyp taǵyldy.
Bul bap boıynsha, ol 20 jylǵa nemese ómir boıyna bostandyǵynan aırylyp nemese ólim jazasyna kesilýi múmkin.
2017 jyldyń qazanynda osy iske núkte qoıylýy yqtımal. Biraq ýaqyty ózgerýi de ǵajap emes.
- Aqjarqyndy elge qaıtarýǵa múmkindik bar ma?
- Árıne. Bul jerde Qazaqstan-Qytaı qatynasy úlken ról oınaıdy. Aqjarqyn Qytaıda sottalsa da, halyqaralyq kelisim boıynsha ol Qazaqstanǵa beriledi. Alaıda onyń birneshe sharty bolýy múmkin. Ol úshin bul is Qytaı qaýipsizdigine qater tóndirmeýi shart.
Men Aqjarqynnyń isi Qytaıdyń qaýipsizdigine záredeı kesirin tıgizbeıdi dep oılaımyn.
- Nege Marııa Dapırkany da siz qorǵaısyz? Reseıde de tájirıbeli qorǵaýshylar bar ǵoı?
- Birinshiden, bizde tájirıbe bar. Marııanyń týǵan týysqandary da Aqjarqynnyń isin kórdi. Sol sebepti menimen baılanysqa shyqty.
- Dapırka isinde úmit bar ma?
- Qazir is Marııanyń qylmystyq oı-pıǵylyn anyqtaý úshin Hoshımın prokýratýrasyna jiberildi.
- Eki istiń de aqyrynan ne kútesiz?
- Marııa Dapırkaǵa kelsek, ol óz kinásin moıyndamaıdy.
Sot úkimi Marııany aıypty dep sheshse, úkimniń oryndalýy Reseıde júzege asýyn suraıtyn bolamyz. Sebebi, eki el arasynda Vetnam jerinde qylmys jasaǵan reseılik azamat eline qaıtarylady degen kelisim bar. Odan arǵy áreketimizde biz qylmystyń keshirilýin ótinetin bolamyz. Aqjarqynǵa kelsek, ol óz kinásin moıyndamaı otyr. Sondyqtan, ol aqtalady dep senip otyrmyz.
- Suhbatyńyzǵa rahmet.
