Qytaıda týrısterge arnalǵan halyqaralyq «densaýlyq tólqujaty» resmı engizildi

BEIJІŃ. QazAqparat – Qytaıdaǵy WeChat messendjerinde «Týrızmge arnalǵan halyqaralyq densaýlyq sertıfıkatynyń» qytaılyq nusqasy bar mını-baǵdarlama resmı túrde iske qosyldy, dep habarlaıdy QazAqparat.

Halyqaralyq densaýlyq sertıfıkatynyń qytaılyq nusqasy – bul egjeı-tegjeıli málimeti bar qujat. Onda nýkleın qyshqyly men IgG antıdenelerine tapsyrylǵan test qorytyndylary jáne COVID-19 vırýsyna qarsy vaktsınalaý statýsy kórsetiledi.

Sertıfıkattyń rastylyǵyn tekserý jáne týrıst jaıynda málimettermen tanysý úshin sheteldik memleketterdiń kez kelgen vedomstvosy QR-kodty skanerleıtin bolady.

Densaýlyq sertıfıkatyn elektrondyq nusqada smartfonmen kórsetýge bolady. Sondaı-aq ony qaǵazǵa basyp shyǵaryp, birge alyp júrýge ruqsat.

«Epıdemıologııalyq jaǵdaıdyń turaqtalyp, pandemııadan keıingi ýaqytta halyqaralyq qyzmetkerler almasýda densaýlyq faktorynyń mańyzdylyǵy erekshe baıqalatyn bolady. Aldaǵy taıaý bolashaqta álem elderinde densaýlyq sertıfıkattaryn ózara taný úrdisiniń artýyna qaraı, «Týrızm úshin halyqaralyq densaýlyq sertıfıkatynyń» qytaılyq nusqasy túrli elder adamdarynyń salaýatty ári qaýipsiz aralasýyna septigin tıgizetin bolady», - delingen QHR SІM Konsýldyq qyzmet departamentiniń WeChat-taǵy málimdemesinde.