Qytaıda turǵyn úıdi 3D-prınterinde basyp shyǵardy
ASTANA. QazAqparat - Qytaılyq Tszıansý (Jiangsu) provıntsııasynyń ónerkásiptik saıabaǵynda 3D-prınteriniń kómegimen salynǵan turǵyn úıler kórmesi ótti. Ǵımarattardyń biriniń bıiktigi 5 qabat, dep habarlady The Daily Mail basylymy.
Úıler bıiktigi 21 fýt (6,4 metr), eni 32 fýt (9,75 metr) jáne uzyndyǵy 500 fýt (152,4 metr) nysandar daıyndaýǵa múmkindik beretin prınterdiń kómegimen salynady. Basyp shyǵarý úshin materıal retinde qosalqy qurylys qaldyqtarynyń qospasy, shyny, bolat jáne tsement paıdalanylady. Bul «qospa» úı qabyrǵasy qajetti qalyńdyqqa jetkenshe, qabattalyp jaǵyla beredi.
Mundaı nysandardy alǵash ret 2014 jyly Shanghai WinSun Decoration Design Engineering Co kompanııasy jasap shyǵardy. Úlken prınterdiń kómegimen betonnan on shaqty birdeı ǵımarat daıyndady. Ár ǵımarat quny - 3,1 myń fýnt sterlıng.
Kórmege qoıylǵan danalardyń ishinde eń az gabarıttisi 100 myń fýnt sterlıngke satylýda. Qunyna qaramastan kompanııa úı basyp shyǵarý úshin júzdegen tapsyrys alǵan. Onyń ishinde Mysyr úkimeti de bar. Winsun kompanııasynyń bas dırektory Ma ıÝ Hı (Ma Yi He) mundaı úıdi bir táýlikte jasap shyǵarýǵa bolatynyn atap ótti.
Onyń aıtýynsha, qurylystyń bul túrinde qaldyqtar qaıta bir ret óńdeledi. Ol keleshektiń qurylys alańdary barynsha tynysh, neǵurlym taza ári kóz qýantarlyq bolatynyna senimdi.
