Qytaıda turatyn úsh qandasymyz Azıada oıyndarynda baq synaıdy
ASTANA. QazAqparat - Indonezııa astanasy Djakartada ótetin HVIII Jazǵy Azııa oıyndarynda Qytaıda turatyn úsh qandasymyz atalǵan eldiń atynan synǵa túsedi, dep habarlaıdy QazAqparat tilshisi.
Bul týraly qytaılyq BAQ ókilderi málim etti.
Aıtalyq erkin kúres túrinen 65 keli salmaq dárejesinde Erlanbek Káteıuly synǵa túsedi. Ol osydan tórt jyl buryn Ońtústik Koreıanyń Inchhon qalasynda ótken Azııa oıyndarynda qola medal jeńip alǵan bolatyn. Sondaı-aq, Qytaı quramasynyń qatarynda Rıo-de-Janeıro Olımpıadasyna qatysqan.
Ekinshi qazaq sportshynyń esimi - Ýálıhan Serikuly. Ol Djakartada grek-rım kúresinen baq synaıdy. Ýálıhan Serikuly 59 keli salmaqta qytaıdyń ishki birinshiliginde eki márte qola júldeger atanǵan. Al úshinshi qandasymyz - boksshy Toqtarbek Tańatqanuly. Ol Azııa oıyndarynda 75 keli salmaqta sharshy alańǵa shyǵady.
