Qytaıda turatyn qazaq kásipqoı boksshy WBC týrnırine qatysady
ASTANA.QazAqparat - Qytaıda turatyn kásipqoı boksshy Beısenbi Násıollauly (13-1-1, 6KO) mamyr aıynda AQSh-ta jekpe-jek ótkizedi, dep habarlaıdy QazAqparat tilshisi.
Hose Sýleıman atyndaǵy Búkilálemdik boks keńesiniń (WBC) jartylaı orta salmaqta ótetin álemdik týrnırinde arnaıy shaqyrýmen 8 kásipqoı boksshy óner kórsetedi. Al «Destroyer» (Talqandaýshy) laqap atymen tanymal qandasymyz bul týrnırge Azııa elderinen qatysatyn jalǵyz boksshy.
Aıta keteıik, alǵashqy jekpe-jekter 27 mamyr kúni Amerıkanyń Kentýkkı shtaty Lýızvıll qalasynda ótedi. Beısenbi osy týrnırdiń basty favorıti WBC International Silver tıtýlynyń ıegeri Fredrık Loýsonmen (26-1-0, 21KO) rıngke shyǵady.
Ulty qazaq Beısenbi Násıollauly bul kúnde Qytaıdaǵy eń tanymal kásipqoı boksshylardyń biri. Buǵan deıingi jekpe-jekterinde qandasymyz WBA jáne WBC tujyrymy boıynsha Azııa chempıony tıtýlyn (WBA International super lightweight title,WBC Asian Boxing Council Continental super lightweight title) jeńip alǵan bolatyn. Qytaılyq jankúıerler onyń bokstasý mánerin jáne kelbetin qazaqstandyq Gennadıı Golovkınge uqsatyp, «OneG» dep atap ketken.
