Qytaıda turatyn qandasymyz kásipqoı bokstan óz salmaǵynda kósh bastady (FOTO)
ASTANA. QazAqparat - Qytaıda turatyn qandasymyz, kásipqoı boksshy Beısenbi Násıollauly jaqynda taǵy bir iri jeńisine qol jetkizip, óz salmaǵynda Qytaı Halyq Respýblıkasy boıynsha 1-orynǵa shyqty.
Beısenbi Násıollauly 2015 jyldyń sońǵy jekpe-jegin osydan bir apta buryn ıÝnan ólkesi Kúnmıń qalasynda ótkizip, 8 raýndtyq jekpe-jekte qarsylasyn básekeniń birinshi mınýtynda sulatyp tastady. Osy jeńisinen keıin ol QHR boıynsha óz salmaǵynda kósh bastady.
Esterińizge sala keteıik, Beısenbi Násıollauly Qanat Islam týǵan Qytaıdyń Altaı aımaǵy Qaba aýdanynda 1994 jyly dúnıege kelgen. Ol birden kásipqoı boksta baǵyn synap, Fılıppın, Taıland, Qytaı elderiniń sańlaqtaryn san soqtyryp, alysta júrse de qazaqtyń abyroıyn bıikterden kórsetip júr.
Ol bıyl Qytaıdyń ishki qalalarynda uıymdastyrylǵan azııalyq kásipqoı jarystarǵa segiz ret qatysyp, barlyǵynda jeńiske qol jetkizdi. Onyń bireýinde ǵana upaı sanymen basym tússe, ózge aıqastarynyń barlyǵyn merziminen buryn aıqyn basymdyqpen aıaqtaǵan.
Beısenbi qazir Qytaıdaǵy «Joń-Veı» kompanııasymen kelisimshartqa otyryp, Lııabyń Duń esimdi fılıppındik bapkerdiń qol astynda jattyǵyp, sheberligin shyńdap júr. Salmaǵy - 147,4 fýnt (66,8 keli), boıy 180 santımetr. Qazir ol jalpy reıtıngte osy salmaq dárejesinde dúnıejúzi boıynsha 270-orynda tur.
Kúnsultan Otarbaı
