Qytaıda tolassyz jańbyrdan myńdaǵan úıler qırap, mıllıonnan astam turǵyn zardap shekti
ASTANA. QazAqparat - Qytaıdyń shyǵys, ońtústik jáne ortalyq aýdandarynda 16 mamyrdan beri jaýyp jatqan tolassyz jańbyr saldarynan mıllıonnan astam adam zardap shekti.
15 adam qaza tapty, jeti adam iz-túzsiz joǵalǵandar sanatynda, dep habarlady Ortalyq Qytaı televıdenıesine silteme jasap TASS.
Jaýynnan janar-jaǵarmaı quıý stansasy qulap, Hýnan provıntsııasy Tszıanhýa-ıAo avtonomdy ýezinde eki adam qaza tapty. Bılik 2 myńǵa jýyq jergilikti turǵyndy qaýipsiz jerge shyǵardy. Tszıansı provıntsııasynda segiz adam ajal qushty, 65 myń adam qaýipsiz jerge shyǵaryldy. 1655 úı qırady. Provıntsııanyń tikeleı ekonomıkalyq shyǵyny 450 mln ıýandy ($73 mln) qurady. Ganchjoý qalasynda 220 myńǵa jýyq úı elektr energııasynsyz qaldy. Gýansı-Chjýan avtonomdy ólkesinde bes adam kóz jumdy, alty turǵyn iz-túzsiz joǵaldy. Gýandýn provıntsııasynyń ákimshilik ortalyǵy - Gýanchjoýdaǵy Baııýn halyqaralyq áýejaıy naızaǵaı saldarynan 360-tan astam áýe reısin ózgertýge májbúr boldy. Shenchjende 230 reıs ushyrylmady. Sınoptıkterdiń boljaýynsha, aýa raıynyń qolaısyzdyǵy jumaǵa deıin saqtalady.
