Qytaıda taıfýn saldarynan 1,3 mln adam evakýatsııalandy
14 qyrkúıek kúni Chjetszıan provıntsııasynyń 1,3 mıllıonnan astam turǵyny osy shyǵys provıntsııanyń jaǵalaý aımaǵyna soqqan «Mýıfa» taıfýny saldarynan evakýatsııalandy. Sonymen qatar 11,8 myńnan astam balyq aýlaý kemeleri portqa oraldy. Chjetszıan bıligi sársenbide taıfýn men sý tasqynyna qarsy sharalardyń eń joǵary deńgeıin jarııalady.
Taıfýnnyń ortalyq bóligindegi jeldiń jyldamdyǵy Chjetszıannyń jaǵalaý aýdandaryna soqqan kezde saǵatyna 150 km-ge deıin jetti. Zardap shekkender men qıraýlar týraly aqparat túsken joq. Sársenbi kúni keshke «Mýıfa» taıfýny Qytaıdyń Shanhaı megapolısine jetti. Bılik barlyq reısterdi qabyldaýdy jáne jiberýdi toqtatý týraly sheshim qabyldady. Shanhaı metropolıteniniń birqatar bólimshesiniń jumysy toqtatyldy.
Sınoptıkterdiń boljamyna sáıkes, beısenbi kúni taıfýn Shandýn jáne Tszıansý provıntsııalary arqyly eldiń soltústigine ótip, birtindep kúshin joǵaltady.
Foto: GlobalLookPress
