Qytaıda taıfýn qurbandarynyń sany 49 adamǵa jetti
BEIJІŃ. Sınhýa - QazAqparat – Qytaı shyǵysyndaǵy Chjetszıan, Shandýn jáne Anhoı provıntsııalaryna tóngen «Lekıma» taıfýny 49 adamnyń ómirin qıdy. Taǵy 21 adam habar-osharsyz ketken, dep habarlaıdy QazAqparat «Sınhýa» agenttigine silteme jasap.
«Lekıma» taıfýny qurlyqqa alapat daýyl men nóser ala kelgen.
Dúısenbi tańyndaǵy málimet boıynsha qaza tapqandar sany 39-ǵa jetip, 9 adam habar-osharsyz ketken.
Bıyl Qytaıǵa kelgen toǵyzynshy taıfýnnan Chjetszıan provıntsııasynyń 6,68 mln turǵyny zardap shekti. Sonyń 1,26 mıllıony evakýatsııalanǵan. 234 myń gektar eginge zaqym keldi. Keltirilgen zalal kólemi 24,22 mlrd ıýannyń (shamamen 3,4 mlrd dollar) aınalasynda.
«Lekıma» Qytaıdyń shyǵys jaǵalaýyna senbi kúni tańǵy 1:45-te jetken. Shandýn provıntsııasynyń Tsındao jaǵalaýyna jeksenbi kúni 8:50-de jetti. Munda apat saldarynan 5 adam qaza taýyp, 7 adam habar-osharsyz ketken, 1,66 mln adam zardap shekti, provıntsııanyń 183,8 myń turǵyny qaýipsiz jerge kóshirilgen.
Shandýnda tolassyz jaýǵan nóser men daýyl saldarynan 175,4 myń gektar egistik alqabyna zaqym kelip, 609 úı qıraǵan. Bılik 1,48 mlrd ıýan ekonomıkalyq zalal keldi dep eseptep otyr. Provıntsııanyń Veıfan qalasynda ortasha jaýyn-shashyn mólsheri 217,5 mm-ge jetken.
Anhoıda 4 adam qaza tapty. 130 myńnan astam zardap shegip, 20 myńy evakýatsııalanǵan.
Munda dúısenbidegi málimet boıynsha, 364 úı tolyqtaı qırap, taǵy 439-yna aıtarlyqtaı zaqym kelgen. 6 myń gektar egistik alqaby typ-tıpyl boldy.
