Qytaıda tarıhı qalalarǵa kirýge shekteý qoıylady
ASTANA. QazAqparat - Beıjińdegi «Jabyq qalalarǵa» týrısterdiń kirip-shyǵýyna shekteý qoıyldy. Budan bylaı tarıhı qalalardy táýligine tek 80 myń adam tamashalaı alady, dep habarlady www.24.kz.
Mýzeı basshylyǵy bul qadamǵa kóne keshenniń kelbetin saqtap qalý úshin barǵan. Sonymen qatar kelip-ketýshi adamdardyń qaýipsizdigi úshin qajet deıdi. Beıjińdegi «Jabyq qalaǵa» jylyna 15 mln týrıst kelip-ketedi. Bul kórsetkish osymen úshinshi jyl qaıtalanǵaly otyr. Kire beriste ǵana emes, tarıhı ǵımarattyń ishi de yǵy-jyǵy. Tipti qytaılyqtar «kóne keshenge keletin saıahatshylar sany Parıjdiń Lývrynan, Londondaǵy Brıtan mýzeıinen de kóp» dep maqtanady. Rekordtyq kórsetkish - byltyr qazan aıynda kúnine 180 myń adam kirip-shyqqan. Biraq munshalyqty mol adam tarıhı eskertkishterdiń saqtalýyna qaýip tóndiredi jáne qyzmet kórsetý sapasyna keri áser etedi.
- «Ekskýrsııa kezinde jan-jaǵyńyzdan tek basqa adamdardyń basyn kóre alasyz. Keń saraıdy súısine aralap, tarıhı jádigerlerdi qaraı almaısyz. Biz týrısterge qyzyqty aqparat berip úlgermeımiz. Halyqtyń tym kóp kelýi úlken máselege aınalyp barady», - deıdi ekskýrsııa jetekshisi Mıao Bın.
Sondyqtan mýzeı basshylyǵy «Jabyq qalaǵa» kirýdegi jańa talap qyzmet kórsetý sapasyn kóteredi» deıdi. Eń bastysy, qaýipsizdik úshin qajet dep otyr.
, «Jabyq qala» mýzeıiniń dırektory Shan Tszısıannyń aıtýynsha, byltyr ortasha eseppen kúnine 46 myń týrıst kelgen eken. Eki aı boıy táýligine 80 myń adam kirip-shyqqan. Bul óte kóp. Sondyqtan budan bylaı shekteýler engizilip otyr.
Munda negizinen Qytaıdyń basqa óńirinen kelýshiler kóp. Іshki týrızm jaqsy damyǵan. Alys aýyldaǵy qytaılyqtar Taıananmyn alańyn, «Jabyq qalany» kórsem dep jetkender. Degenmen olar jańa talap ózimiz úshin jaqsy dep quptap otyr. Al alypsatarlardyń jolyn kesý úshin bılet tek jeke azamattyq kýálikpen satylady. Top-topqa bólingen týrısterdiń jetekshileri aldyn ala ınternetten tapsyrys bermese, kassada bılet berilmeıdi.
