Qytaıda taǵy bir qanisher balabaqshaǵa shabýyl jasady: manıak balalarǵa balǵa alyp júgirgen
ASTANA. Sáýirdiń 30-y. QzAqparat - Qytaıda balabaqshaǵa taǵy bir shabýyl jasaldy. Bul sońǵy birneshe kúnniń ishinde búldirshinderge qarsy jasalyp otyrǵan úshinshi qastandyq.
Sońǵy oqıǵa búgin tańerteń Qytaıdyń Shandýn provıntsııasyndaǵy Veıfan qalasynda oryn aldy: belgisiz qylmysker bastaýysh mekteptiń daıarlyq synybynyń oqýshylaryna qolyna balǵa alyp júgirgen, dep habarlaıdy «Sınhýa» agenttigi.
Qanisher bes balany jaralap úlgergen. Keıin ol óziniń jáne eki búldirshinniń ústine benzın quıyp, ot qoıǵan. Mektep muǵalimderi balalardyń ómirin aman alyp qalǵan. Zardap shekken balalardyń barlyǵy qazir aýrýhanada jatyr, dárigerlerdiń aıtýynsha, olardyń ómirlerine eshqandaı qaýip joq.
Polıtsııa bul oqıǵanyń mán-jaıyn tekserip jatyr. Mundaı oqıǵalardyń kóbeıip ketýi nemen baılanysty ekenin qytaı polıtsııasy ázirge aıta almaı otyr.
Esterińizge sala keteıik, osynyń aldynda 47 jastaǵy er azamat Taısın qalasyndaǵy balabaqshaǵa basyp kirip, 28 balany, kúzetshini jáne eki tárbıeshini pyshaqtaǵan bolatyn. 4 jasar bes bala qazir aýrýhanada aýyr jaǵdaıda jatyr. Al odan bir kún buryn Gýandýn provıntsııasyndaǵy bastaýysh mektepte osyndaı oqıǵa oryn alǵan bolatyn. Onda júıkesi juqarǵan muǵalim balalarǵa pyshaq alyp júgirgen. Ol 16 oqýshy men bir muǵalimdi jaralaǵan.
