Qytaıda sel tasqyny qurbandarynyń sany 337 adamǵa jetti
BEIJІŃ. Tamyzdyń 10-y. QazAqparat /Rýslan Súleımenov/- Soltústik-Batys Qytaıdyń Gansý ýálaıatyndaǵy Gannan-Tıbet avtonomııalyq ólkesiniń Chjoýtsıýı ýezinde bolǵan sel tasqyny saldarynan opat bolǵandardyń sany 337 adamǵa jetti.
«Sınhýa» agenttiginiń habarlaýynsha, 1242 adam qutqaryldy, taǵy 1 148 adam iz-túzsiz joǵalǵandar sanatynda. Apat saldarynan 300-den astam úı qırap, 700-deı úı zaqymdandy, taǵy 3 myńdaı úıdi sý basyp qaldy. Jalpy alǵanda, tabıǵat apatynan 47 myń adam zardap shegip otyr, al kelgen shyǵyn áli naqtylanýda.
Qytaıdyń Jer jáne tabıǵı resýrstar mınıstri Sıýı Shaoshıdiń aıtýynsha, Chjoýtsıýı ýezine úlken shyǵyn keltirgen sel tasqyny geoqurylymdyq jáne geomorfologııalyq sebepterden týyndap otyr. Chjoýtsıýı sel tasqyny, laı kóshkini jáne jer silkinisi sııaqty geologııalyq apattar jıi bolyp turatyn Tsınlın taýlarynyń batys bóligindegi aýdanda ornalasqan. 2008 jyly mamyrdyń 12-sinde Qytaıdyń ońtústik-batysyndaǵy Sychýan ýálaıatynyń Venchýan ýezinde bolǵan jáne sol kezde Chjoýtsıýı ýezi de zardap shekken qýatty jer silkinisi jergilikti taý jynystaryn nyǵyzdaǵan, sonyń saldarynan taý jynystarynyń opyrylý qaýpi kúsheıgen. Mınıstrdiń túsindirýinshe, jaz bastalǵaly beri Qytaıdyń basym bóliginde úlken qurǵaqshylyq saqtalyp kelgen, sonyń nátıjesinde Chjoýtsıýı ýezi ornalasqan taýly aýdanda jaryqtar paıda bolǵan. Osyndaı jaǵdaıda jaýǵan nóser jaýyn taý jynystarynyń opyrylýyna jáne sel tasqynynyń kóshýine sebep bolýy múmkin.
