Qytaıda sekta músheleri ólim jazasyna kesildi
ASTANA. QazAqparat - Qytaıda sot tyıym salynǵan sektanyń eki múshesi ólim jazasyna kesildi. Olar Shandýn Shyǵys provıntsııasyndaǵy «Makdonalds» meıramhanasynda áıel adamdy óltirdi dep aıyptalyp otyr, dep habarlady VVS.
Tergeý amaldarynyń qorytyndysy boıynsha, oqıǵa qurbany 37 jastaǵy Ý.Shoıan mamyr aıynda sektanttarǵa óz telefon nómirin berýden bas tartqany úshin óltirilgen. Onyń ólime sebep bolǵandar meıramhana vıdeokameralaryna túsip qalǵan jáne ony oqıǵa kýágerleri uıaly telefondaryna túsirip alǵan.
Sektanyń taǵy bir múshesi soqqy jasaýǵa qatysqany úshin túrmege qamalady. Aıta keteıik, «Qudiretti Qudaıdyń shirkeýi» degen atpen tanys dinı topqa Qytaıda tyıym salynǵan. Onyń ókilderi sektadaǵy adamdar sany mılıonnan asatynyn aıtyp otyr. Aıyptalýshylardyń biri Djan Lıdýn qamaýǵa alynǵannan keıin jýrnalısterge suhbat berdi. Onda ol óziniń jasaǵan isine esh ókinbeıtinin jetkizdi. «Men ony bar kúshimmen urdym. Sondaı-aq, aıaǵymmen teptim. Ol - ázázil, saıtan. Biz onyń kózin joıýymyz kerek boldy», - dedi ol. «Qudiretti Qudaıdyń shirkeýi» doktrınasy boıynsha, olar qytaı qyzy beınesinde jerge túsken «Qudaıǵa» senedi. Onyń sózine qaraǵanda, adam keıpindegi qudaımen burynǵy fızıka muǵalimi, 25 jyl buryn osy aǵymnyń negizin qalaǵan Chjao Veıshan ǵana kezdesken. Biraq, ol AQSh-ta turady.
