Qytaıda saǵatyna 600 km jyldamdyqpen júretin poıyz iske qosylmaq
ASTANA. QazAqparat - Qytaıda saǵatyna 600 shaqyrym jyldamdyqpen qozǵalatyn júrdek poıyzdy iske qosý múmkindigi zerttelýde, dep habarlaıdy QazAqparat tilshisi «Jenmın jıbao» aqparattyq portalyna silteme jasap.
«Qazir saǵatyna 400 kılometrden joǵary jyldamdyqpen júretin jáne relsti ózdiginen aýystyra alatyn poıyzben birge, jyldamdyǵy saǵatyna 600 kılometr bolatyn magnıtti qalqyma poıyzdy zertteý ústindemiz. Bolashaqta jolaýshylar ushqyr poıyzǵa mingende, otbasylyq kınoteatrda otyrǵandaı sezinetin bolady», - dedi akademık Dıń Ruńjún Memlekettik keńestiń aqparat ortalyǵynda ótken jıyn barysynda.
Ǵalymnyń aıtýynsha, álemdegi eń júrdek bolatyn bul poıyzdyń energııa únemdeýi búgingi qoldanystaǵy jyldam temirjol kólikterinen áldeqaıda alda bolady.
«Energııany sarp etý mólsheri adam basyna shaqqanda orta eseppen qazirgi ýaqyttaǵy «Hyshıe» atty ushqyr poıyzdan 17% tómen bolady», - deıdi akademık.
Dıń Ruńjúnniń sózinshe, Qytaıdyń qazirgi tańdaǵy ushqyr poıyz salasyndaǵy zertteýleri álemdegi eń ozyq sanalady.
Ol sondaı-aq zerttelý ústindegi jańa poıyzdyń eń basty artyqshylyqtaryn atady. Poıyzdyń jyldamdyǵy artyp qana qoımaı, uıaly telefon sıgnaly da jaqsara túsedi. Onymen qosa, vagondardy kınoteatrlarǵa barynsha jaqyndatý úshin, onyń terezeleri elektrondy ekran etip jasalmaq. Sóıtip, jolda uzaq bolǵan jolaýshylar dittegen jerine sharshamaı jetetin bolady.
Aıta keteıik, magnıtti qalqyma poıyzdar basqasha magnıtoplan nemese maglev dep atalady. Olar bolat joldarmen magnıtti óristiń kúshimen qozǵalady. Mundaı quramdar, dástúrli poıyzdarmen salystyrǵanda qozǵalys barysynda relstiń ústimen janaspaıdy. Sebebi temirjol men poıyzdyń arasynda keńistik bolady.
Foto: jj-tours.ru
