Qytaıda Reseıden ımporttalǵan taýarlardan koronavırýs tabyldy

BEIJІŃ. TASS-QazAqparat – Reseımen shekaralas aımaqta ornalasqan Heıhe qalasy (Heılýntszıan provıntsııasy, Soltústik-Shyǵys Qytaı) Reseıden ımporttalǵantaýarlar qaptamalarynan koronavırýs úlgileri tabyldy. Bul týraly jeksenbi kúni qalanyń Aýrýdy baqylaý jáne aldyn alý ortalyǵy málim etti, dep habarlaıdy QazAqparat TASS agenttigine silteme jasap.

WeChat áleýmettik jelisindegi ortalyqtyń resmı akkaýntynda jarııalanǵan málimdemege sáıkes, senbide Heıhe bıligi Reseı Federatsııasynan ımporttalǵan taýarlar saqtalatyn qalalyq qoımada tekserý júrgizgen.

Qujatta kórsetilgendeı, koronavırýs reseılik ónimniń tórt túriniń syrtqy qaptamasynan anyqtalǵan.

Olar: KONTI brendiniń shokoladty vaflıi (shyǵarylǵan kúni 4 tamyz), KONTI pechenesi (4 tamyz), KONTI qaýyn dámimen jele kámpıtteri (17 tamyz), sondaı-aq qurǵaq sút (2020 jylǵy 8 qazan). Vırýs anyqtalǵan qaptamalardyń naqty sany týraly habarlanbaǵan.

Heıhe bıligi atalǵan óndiris kúni atalǵan óndiristiń kórsetilgen kúni shyǵarylǵan ónimin alǵan azamattardy taýarlardy dereý dezınfektsııalaýǵa, sondaı-aq bul týraly Aýrýlardy baqylaý jáne aldyn alý ortalyǵyna habarlaýǵa shaqyrdy.

Sonymen qatar, atalǵan taýarlardy ótkizý oryndarynda júrgizilgen tekseris kezinde koronavırýsqa test teris nátıje kórsetti.

Reseıdiń Qytaıdaǵy saýda ókildigi beısenbide habarlaǵandaı, Reseı Federatsııasymen shekaralas keıbir Qytaı qalalarynyń bıligi koronavırýsqa baılanysty ónimder ımportyna jańa shekteýler engizdi.

Máselen, 10 qarashada Heılýntszıan provıntsııasyndaǵy Sýıfenhe shekaralas qalasynyń bıligi «Sýıfenhe-Pogranıchnyı» temirjol ótkizý beketiniń ákimshiliginen keıbir ımporttyq azyq-túlik ónimderin ákelýge ýaqytsha shekteýler engizýdi talap etti.

9 qarashadan bastap «Zabaıkalsk-Manchjýrııa» shekara ótkeli ornalasqan Hýlýn-Býır qalalyq okrýgi (Іshki Mońǵolııa avtonomııalyq aýdany, Qytaıdyń soltústigi) da barlyq baqylaý-ótkizý pýnktteri arqyly salqyndatylǵan azyq-túlik pen basqa da tasymaldanatyn ónimderdi ımporttaýdy toqtatty.