Qytaıda pedofılderdiń jeke málimetteri jarııalanatyn bolady
BEIJІŃ. QazAqparat - Chjetszıan shyǵys-qytaılyq provıntsııanyń Nınbo qalasynyń Tsysı ýeziniń bıligi qaǵıda shyǵardy, oǵan sáıkes jergilikti úkimet, sondaı-aq WeChat jáne Sina Weibo áleýmettik jelilerinde pedofılderdiń tegi, esimi, fotosy, turatyn jeri men jumys orny týraly derbes aqparat jarııalanatyn bolady.
Bul norma kámelettik jasqa tolmaǵandarǵa qatysty zorlyq, seksýaldyq sıpattaǵy is-áreketi, kámelettik jasqa tolmaǵandardy jezókshelikke tartýdy uıymdastyrǵany úshin bes jyldan artyq merzimge sottalǵan tulǵalarǵa qatysty. Kámelettik jasqa tolmaǵandarǵa qatysty seksýaldyq sıpattaǵy quqyq buzýshylyq boıynsha ákimshilik jaýapkershilikke tartylǵan jáne budan keıin eki jyl ishinde zańdy qaıta buzǵan tulǵalar týraly derbes málimet te jarııalanýǵa jatady.
Pedofılder týraly aqparat Internetke ornalastyrylady jáne qylmyskerler sottalyp kelgennen keıin bes jyl ishinde ashyq qoljetimdilikte bolady.
Jańa qaǵıda people.cn saıtynda suralǵan 2430 respondenttiń 98 paıyz qoldaýyna ıe boldy.
«Boıjetkenderdi qorǵaý» qytaı úkimettik emes uıymynyń baıandamasyna sáıkes, 2015 jyly BAQ-ta jarııalanǵan balalarǵa (340) qatysty seksýaldyq sıpattaǵy qylmystardyń 30 paıyzyn burynǵy qylmyskerler jasaǵan.
Qytaı qoǵamynda atalmysh qaǵıdany Tsysı qalasynyń bıligi maquldaǵanyna qaramastan, Qytaı qoǵamdyq ǵylymdar akademııasynyń sarapshylary bul jańa ózgeris túrmede bolǵan tulǵalardyń áleýmettik beıimdelýine keri yqpal etetinin atap ótýde.
