Qytaıda ózge ult ókilderi qazaqtyń tilin, mádenıetin bilýden jarysty
ASTANA. QazAqparat - Qytaıdyń joǵary oqý oryndarynda oqyp jatqan ózge ult stýdentteri arasynda qazaq tiliniń sheteldegi mártebesin kótergen jarys ótti, dep habarlaıdy QazAqparat kazakh.cctv.com saıtyna silteme jasap.
Qazaq tiline úlken qyzyǵýshylyq tanytyp, qurmet kórsetken bul sharany Shyńjań til-jazý komıteti, Beıjińdegi Ortalyq ulttar ýnıversıtetiniń qazaq tili jáne ádebıeti fakýlteti, Shynjań ýnıversıteti, Іle pedagogıka ýnıversıteti jáne Qytaı tilder ýnıversıteti syndy bilim ordalary uıymdastyrdy.
Úrimji qalasyndaǵy Shyńjań ýnıversıtetinde ótken jarysqa Qytaıdyń joǵary oqý oryndarynda qazaq tili mamandyǵy boıynsha bilim alyp jatqan ózge ult jastary qatysty. Qazaq tiliniń alaman báıgesinde 24 stýdent baǵy men babyn synady. Qatysýshylardyń deńgeıin ár qyrynan synaǵan baıqaý birneshe kezeńge bólingen. Olar jazbasha, aýyzsha emtıhan tapsyryp, qytaı, qazaq tilderinde aýyzeki aýdarma jasaý, berilgen qazaqsha mátindi jatyq oqyp, mazmundap berý, berilgen taqyryp aıasynda maqala jazý túrleri boıynsha synaqtardan ótti. Baıqaý barysynda qazaq mádenıeti men ulttyq dástúrine jáne qazaqsha jańa ataý, termınderge basymdyq berilgen.
Osylaısha, eki kúnge jalǵasqan shara sońǵy máresine jetip, qazylar alqasy qazaqtyń tilin, ulttyq dástúrin jaqsy meńgerip, shyn júırik ekendigin dáleldegen jeńimpazdardy anyqtady. Olar Beıjińdegi Ortalyq ulttar ýnıversıtetiniń stýdenti Go Haý, Shynjań ýnıversıtetiniń stýdenti Go Shýjýán, Іle pedagogıka ýnıversıtetiniń stýdenti Ýań Zylı.
Shara sońynda Ortalyq ulttar ýnıversıteti, qazaq tili jáne ádebıeti fakýltetiniń dekany, qazaq tiliniń mamany, professor Jań Dıńjyń qazaq tilin ulyqtaǵan kelesi jarys Beıjińdegi Ortalyq ulttar ýnıversıtetinde ótetinin habarlady.
