Qytaıda ótip jatqan BUU-nyń klımat jónindegi kelissózderi ázirge eshqandaı nátıje bergen joq
BEIJІŃ. Qazannyń 7-si. QazAqparat /Rýslan Súleımenov/ - Qytaıda ótip jatqan BUU aıasyndaǵy Klımattyń ózgerýi jónindegi halyqaralyq kelissózge qatysýshylar ortaq kelisimge kele almaı otyr. Bul týraly beısenbi kúni Tıantszınde amerıkan delegatsııasynyń basshysy Djonatan Pershıng málim etti.
D.Pershıngtiń aıtýynsha, AQSh-tyń jahandyq jylymyqpen baılanysty zııandy gazdardyń shyǵarylýyn shekteý qajettiligine qatysty pikiri damýshy elderdiń, onyń ishinde Qytaı men Úndistannyń pikirlerine qaıshy kelip otyr. Osyǵan oraı, Tıantszındegi kelissózderdiń barysynda jáne qarasha aıynda Meksıkada ótetin BUU-nyń Klımattyq problemalar jónindegi sammıtinde oń nátıjelerge qol jetkizý úshin biraz jumystar atqarylýy kerek.
AQSh-tyń «Kıoto hattamasyna» qosylǵanyn, biraq ony Kongrestiń ratıfıkatsııalamaǵanyn atap kórsetken D.Pershıng, osyǵan oraı AQSh úkimeti klımattyń ózgerýi salasyndaǵy tıisti erejelerdi Parlamentten tys qabyldaǵaly otyrǵanyn jetkizdi.
Tıantszınde bas qosyp otyrǵan 170-ten astam eldiń ókilderi merzimi 2012 jyly aıaqtalatyn Kıoto hattamasyn almastyra alatyn kelisimdi talqylaýda.
