Qytaıda ótetin Jasóspirimder Olımpıada oıynynda Qazaqstan namysyn 50 sportshy qorǵaıdy
ASTANA. QazAqparat - Qytaıda Nankın qalasynda ótetin 2-shi Jasóspirimder Olımpıada oıynynda Qazaqstan namysyn 50 sportshy qorǵaıdy. Bul týraly búgin QR Sport isteri jáne dene shynyqtyrý agenttigi tóraǵasynyń orynbasary Elsııar Qanaǵatov málim etti.
«Qazirgi ýaqytta Nankın qalasyda ótetin 2-shi Jasóspirimder Olımpıada oıyndaryna qatysý úshin 42 lıtsenzııa ıelendik jáne bul oıyndarǵa 50 sportshy qatysatyn bolady», - dedi agenttik tóraǵasynyń orynbasary.
Onyń sózine qaraǵanda, sportshylar olımpıadaǵa daıyndyq ortalyqtarynda daıyndaý ústinde. Sportshylardyń basym bóligi Almaty oblysynan.
«Bizder eń birinshi kezekte altyn medal jeńip alý mindetin júktep otyrmyz. Altyn medaldy grek-rım kúresinen, aýyr atletıkadan jáne bokstan enshileýdi josparlaýdamyz. Kúmis medalmen kanoe esýden, erkin kúresten jáne bokstan qanjyǵamyzdy maılamaqpyz. Al qola medaldy taekvondodan, grek-rım kúresinen, áıelder kúresinen, dzıýdodan, bokstan, júzýden, qazirgi bessaıystan alý josparda bar», - dedi E.Qanaǵatov
Aıta keteıik, Qazaqstannyń qurama komandasy birinshi oıyndarda sporttyń 19 túrinen 33 lıtsenzııa utyp alǵan bolatyn. Beıresmı esepte Qazaqstan 24-shi orynǵa turaqtaǵan edi.
