Qytaıda opasyzdyq pen kisi óltirý kórinisteri bar telehıkaıalardyń kórsetilýine tyıym salyndy
ASTANA. QazAqparat - Qytaı úkimeti beınematerıaldar júkteletin saıttarǵa telehıkaıalardan barlyq keleńsiz kórinisterdi alyp tastaýdy buıyrdy, dep habarlady Qytaıdyń Global Times gazetiniń málimetterine súıengen VVS.
Qytaılyqtar ǵalamtordan kóbine sheteldik teleshoýlardy, negizinen AQSh pen Ońtústik Koreıanyń teleónimderin tamashalaıdy. Alaıda endi qytaı BAQ-taryn retteýshiniń nusqaýymen saıttar erli-zaıyptylar arasyndaǵy bir-birine degen senimdi buzatyn nemese tym ashyq kórinisterdi pash etetin kadrlardy joıýlary kerek. Sonymen birge kisi óltirý, ózine-ózi qol jumsaý, adam urlaý, esirtkini tutyný, qumar oıyndary men «tylsym qubylystar» beınelenetin kórinisteri bar beınematerıaldardy da taratýǵa tyıym salyndy, delingen eldiń baspa isi, radıo, kıno jáne televızııa memlekettik retteýshisiniń málimdemesinde. Qytaıdyń áleýmettik jelilerinde kórermender tyıym salynǵan kórinisterdiń tym kóp ekenin jáne kóretin eshteńe qalmaǵanyn aıtyp shaǵymdanyp jatyr. Olardyń kóbi endi Qytaıda keńinen tanymal ózderiniń súıikti káris telehıkaıalaryn kóre almaıtynynan qaýiptenýde. Jańa erejeler pornografııa men «turpaıylyqqa» qarsy el úkimetiniń qolǵa alǵan sharasy aıasynda jarııalandy. Shara «Ǵalamtordy tazarý-2014» dep atalady.
