Qytaıda ómir boıyna bas bostandyǵynan aıyrylý jazasy kesilgen A. Turlybaıdyń isi boıynsha appelıatsııalyq satyda sot otyrysy ótti
BEIJІŃ - GÝANChJOÝ. QazAqparat - Búgin QHR Gýandýn provıntsııasyndaǵy Gýanchjoý qalasynda jergilikti ýaqytpen saǵat 11.00-den 16.00-ge deıin esirtki kontrabandasy boıynsha aıyptalyp, ómir boıyna bas bostandyǵynan aıyrylý jazasy kesilgen Aqjarqyn Turlybaıdyń isine qatysty appelıatsııalyq satyda sot otyrysy ótti.
«Sýdıa Aqjarqynnyń isindegi jańa ashylǵan birqatar mán-jaılardy qaraıdy. Boıjetkenniń jaǵdaıy jaqsy. Ol anasy Zýhramen 15 mınýtqa kezdesti. Shaǵym joq, densaýlyǵy qalypty. Ádette kezdesýge sot sheshiminen keıin ǵana ruqsat beretin. Osy joly qytaılyq tarap anasyna Aqjarqynmen áńgimelesýge múmkindik berdi», - dedi QazAqparatqa bergen suhbatynda QHR-daǵy QR Elshiliginiń konsýldyq bóliminiń basshysy B. Syrlybaev.
Eske salsaq, 20 jastaǵy qazaqstandyq stýdent Aqjarqyn Turlybaı Gýanchjoý áýejaıynda 2014 jylǵy naýryzda ustalǵan.
Ol Qytaıǵa satý úshin brendtik kıim alýǵa barǵan. A. Turlybaıdyń aıtýynsha, oǵan esirtkini klýbta kezdeısoq tanysqan adamdar salyp jibergen. Qazaqstandyqqa ómir boıyna bas bostandyǵynan aıyrý jazasy kesildi. Turlybaıdy qorǵaýshy tarap úkimge shaǵymdanatynyn málimdegen.
